MAZMUR 19 - Alkitab Singog In Mongondow Masa In Tanaa

Kamuliaan i Tuhan kon inta pinomia-Nea bo kon hukum-Nea

¹ Kon i itoi in mododondong. Mazmur i Daud.

Kamuliaan i Tuhan kon inta pinomia-Nea

² Ḷangit noponiata in kamuliaan i Allah, bo baḷangon mopotaau in inta inaidan-Nea.

³ Singgai inta tobatú in mopotaau intua kon singgai moiduduimai; doḷom inta tobatú mongonguman kon inta moiduduimai.

⁴ Diábí in mongonguman andeka mongunsingog, diábí in singog in kodongogan.

⁵ Táe kuaninea in kodongogan kon sinangkub in dunia, koyow tatua in noidapot kon popod mita in butá. Ki Tuhan in nobaḷoi kon ḷangit kon i mata in singgai,

⁶ doḷo-doḷom momuká in sia naonda bo nonikaan ḷoḷaki iḻumuai nongkon gopotnea, naonda bo pahlawan inta noḷunganga in gina momangkoi kon bobayáannea.

⁷ Sia in noḻibu kon ḷangit nongkon popodnea tobatú nodapot in popodnea ibanea; diábí in kotaḻiban in patúnea.

Hukum i Tuhan

⁸ Hukum i Tuhan tua in motomoman, mokosanang kon dimukud. Parenta i Tuhan motaau pirisayaan, mobogoi in hikmat kon intau inta diá kopongalaman.

⁹ Atorang i Tuhan tua in noitombutung, mokosanang kon gina. Hukum i Tuhan tua in modarit, mokopomangaḻe kon intau.

¹⁰ Motoguondok kon i Tuhan tua in mopiabí, moiyaputbí in mononoi. Hukum i Tuhan tua in totuubí bo moadilbí komintan.

¹¹ Hukum i Tuhan in kon ḻimonikanbí in buḷawan taakan, moromi-romimitbí nongkon biluk taakan.

¹² Mogogundoi-Mu naa in bagupa inogoian in tompoingat in bayongan tatua; bungai in pinogaidan sinadia kon intau inta notoindudui kon tua.

¹³ Diábí in mokomangaḻe kon kinoḷaḻeannea; Tuhan, poḷuatdon in akuoi nongkon taḷá inta noibuni.

¹⁴ Poyayúdon in akuoi nongkon dosa inta sinontuon inaidan, donaai pomayá mako in akuoi kawasaannea. Dá mobaḻídon in akuoi diá in bogit, bo moiḷuatdon nongkon aid moitaḷá inta mobogat.

¹⁵ Igumon mako tosingogonku mita bo raianku koibog-Mu, o Tuhan, moḷoḷukad bo mototobutku!