MAZMUR 18 - Alkitab Singog In Mongondow Masa In Tanaa

Dondong sukur i Daud

¹ Kon i itoi in Koor. Mazmur i Daud, mogogundoi i Tuhan. Pinodondong kon i Tuhan kon tungkuḷ in ki Daud pinosaḷamat nongkon i Saul bo musungnea mita.

² Akuoi in motabi kon ini-Mu, o Tuhan, Ikobí in nobaḻí ropotku.

³ Ki Tuhan in naonda bo dinding inta moropot pogogadopanku. Ki Allahku in naonda bo buḷud batu pononiunganku. Naonda bo kaḻeaw inoḻingoian-Nea in akuoi, bo noḷukad kon inakó sinbá umuran in akuoi moaman.

⁴ Akuoi in nokuani kon i Tuhan inta patus dayowon, Sia in noposaḷamat kon inakó nongkon musungku mita.

⁵ Akuoi in iḻibudon in bodito mokopatoi, bo sinaḷomdon in ḷunud poyopú.

⁶ Akuoi in iḻibudon in bodito mokopatoi, poyogaḷap in popatoi kon tayowonkumai.

⁷ Kon bonu in roriga nokuani in akuoi kon i Tuhan, akuoi in nomaḷú kon i Allahku mokituḷung. Nongkon Baḷoi-Nea inindongogan-Nea in singogku bo nonondudut kon kuaniku.

⁸ Bo nodandú in dunia bo noḷundan, apad mita in buḷud nodandú bo mogugur popisí in torú i Allah.

⁹ Poyok moiroput nongkon bubú in ngiung-Nea, tuḷú bo baga in ḷumuai nongkon bibig-Nea.

¹⁰ Ḷangit binotak-Nea, bo noponag in Sia bo goḷom mosindip in kon ḻimonag in sioḷ-Nea.

¹¹ Sia in iḷumayug sinumakoi kon kerub; Sia in ḷumayug kon tudu in koḻikip in tompot.

¹² Sia in nopongaḷumbun in sindip; goḷom morondí inta mobunod iḻimibu kon i-Nia.

¹³ Nongkon kilat inta kon tayowon-Nea, iḷumuaidon in goḷom, uyan eis bo tuḷú.

¹⁴ Bo ki Tuhan in nonggotup nongkon toḷungayá; Ki Inta Totok in Moḷantud nopodongog in singog-Nea.

¹⁵ Sia in nopopiot in piot-Nea mita bo noporarit in musung; Sia in nopotampí in kilat nopobui-buimai, bo nodapot in mosia noḷagui.

¹⁶ Apad in dagat inontongdon bo aip in butá nobukat kon dodai in ki Tuhan nongguak kon musung-Nea pinongin torú.

¹⁷ Nongkon omonik ki Tuhan nopotuntun in ḻima-Nea; kinadaian-Nea in akuoi bo inugut-Nea nongkon tubig inta noḻinow.

¹⁸ Sia in noposaḷamat kon inakó nongkon musung inta motorindog bo nongkon intau mita inta nondoí kon inakó, sin mosia in diá kotaḷowanku.

¹⁹ Mosia in nonubu kon inakó kon tungkuḷ in akuoi kinoantugan in bodito, táe ki Tuhan in nobaḻí mototuḷungku.

²⁰ Sia in nopoḷuat kon inakó nongkon anib bo noposaḷamat kon inakó popisí in kinoibog-Nea in akuoi.

²¹ Ki Tuhan in notuḻí kon aidku inta noitutui; binarakatan-Nea in akuoi sin akuoi in diá kotaḷá.

²² Akuoi in notoindudui kon parenta i Tuhan bo diábí nonoḻikud kon i Allahku.

²³ Bayongan in hukum-Nea sinaridianku, parenta-Nea mita diábí in sinaḻibanku.

²⁴ Kinotaauan-Nea kon akuoi in diábí in bogit bo iyumayú nongkon noitaḷá.

²⁵ Dá ki Tuhan in notuḻí kon oaidku inta noitutui sin kinotaauan-Nea kon akuoi in diábí kotaḷá.

²⁶ Tuhan, Iko in mosatia kon intau inta mosatia bo mopia kon intau inta mopia.

²⁷ Iko in moponiata kon intau kon motusi in Iko, táe intau inta moraat in nobaḻí musung-Mu.

²⁸ Intau inta moompá in gina pinosaḷamat-Mu, táe intau inta mokaḷakuang in pinotungkud-Mu.

²⁹ Iko in nopoyongkit in togáku; ki Tuhan Allahku in nonimbayag kon sindip in kinobiaganku.

³⁰ Iko in nobogoi in ropot kon inakó sin moyompat kon musung; takin totuḷung i Allahku dinangatanku in dinding in musung.

³¹ Oaid i Allah in nosompurna dandi i Tuhan motaau pirisayaan. Sia in naonda bo kaḻeaw kon bayongan in intau inta namangoi kon i-Nia.

³² Sin tongábí ki Tuhan in Allah; Tongábí ki Allah in mododuḷu naton.

³³ Sia tua in ki Allah inta nobogoi in ropot kon inakó bo nopoodom kon daḷanku.

³⁴ Sia in noporoton in sioḷku naonda bo sioḷ in rusa, bo noḷukad kon kasaḷamatanku kon buḷud.

³⁵ Sinundú-Nea in akuoi moparang, dá motaaudon in akuoi momadang kon puḷu in piot inta totok in moropot.

³⁶ Tuhan, Iko in noḷukad bo noposaḷamat kon inakó, bo nogopod kon inakó in kawasa-Mu; akuoi in noiḷontú popisí in aid-Mu.

³⁷ Iḷukadan-Mu in akuoi sinbá diá kodakopan in akuoi, bo diá kon dodai in onda in akuoi in noḷabú.

³⁸ Dinuduranku in musungku bo sinaḷowku in mosia, bo diábí umundok modapot in mosia moyopú.

³⁹ Pomobakku in mosia modapot in diádon mokobangon bui, mosia in moobat diádon mokopongonu kon tayowon in sioḷku.

⁴⁰ Inogoian-Mu in akuoi in ropot pakéon poparang, bo pinountung-Mu nongkon musungku mita.

⁴¹ Binaḻí-Mu noḷagui in musungku mita kon inakó; intau mita inta mondoí kon inakó iyopúku.

⁴² Kinumarak in mosia, táe diá in notuḷung, mosia in nokuani kon i Tuhan, táe diábí sinubagan-Nea.

⁴³ Mosia in irimumudku naonda bo ḷobud inta posirarit, bo kinaitanku naonda bo yoná kon daḷan.

⁴⁴ Pinoḷuat-Mu in akuoi kon inanakan inta moraat, bo binaḻí-Mu in akuoi mongongawasa kon bangusa mita; bangusa inta diá kinotaauanku in nobaḻí bobantungku.

⁴⁵ Intau mita ango-angoi tumungkud kon inakó bo motoindudui aka mokodongog kon parentaku.

⁴⁶ Barani monia in noinggamádon; nourot in mosia bo iḻumuai nongkon poḷoḷukadan monia.

⁴⁷ Ki Tuhan in nobiag! Dinayo-dayowdon in mododuḷuku! Poḷantudon in koḷoḷoben i Allah mopoposaḷamatku!

⁴⁸ Pinountung-Nea in akuoi nongkon musungku; bangusa mita in pinotungkud-Nea kon tayowonku,

⁴⁹ pinosaḷamat-Nea in akuoi nongkon ḷawangku mita. Tuhan, pinopountung-Mu in akuoi kon musungku, inoḻingoian-Mu in akuoi nongkon intau mita inta moḻingá.

⁵⁰ Dá pinomuliaku in Iko kon sigad in bangusa mita, bo akuoi in nopoyaput in dondong dodayow kon ini-Mu.

⁵¹ Ki Allah in nobogoi in kinountungan moḷoben kon i datu-Nea, Sia in umuranbí motabi kon intau inta piniḻí-Nea, tuata in ki Daud bo buínea modapot in mononoi.