MAZMUR 16 - Alkitab Singog In Mongondow Masa In Tanaa

Sambayang takin ḻimbatú in pirisaya

¹ Mazmur i Daud, Ḷukadaidon in akuoi, o Allah, sin kon ini-Mubí in poniunganku.

² Akuoi in moguman, “Ikobí in ki Tuhanku, mokoḷunganga kon ginaku, diábí in noiḻimpat kon ini-Mu!”

³ Ihoromatku in intau mita motusi kon butá tanaa; inta mokosanang kon ginaku in mogutunbí takin i monia.

⁴ Biódon mako in intau inta mosumba kon dewa mita moduga-dungangdon in ajar in ginanea. Akuoi in doíbí mobogoi in kuruban kon dewa mita, nodapotbí in doí monangoi kon tangoi monia.

⁵ Tuhan, tongá Iko in kinoibogku; Iko in nobogoi in bayongan inta paraḷuku, ukurku in kon bonubí in kawasa-Mu.

⁶ Totuubí mogaga in inta inogoi-Mu kon inakó, totok in mokosanang kon ginaku!

⁷ Akuoi in modayow kon i Tuhan inta nononggina kon inakó; kon dodai in doḷom ginaku mobogoi in totundú kon inakó.

⁸ Akuoi in umuranbí mokotorop kon i Tuhan; Sia in oyúonbí kon diugku, dá diá in akuoi modandú.

⁹ Tuamai in ginaku in moḷunganga bo dimukudku in monggoḷokap, bo awakku in mogogai takin moodom.

¹⁰ Sin diábí pinomayá-Mu mako matoi in akuoi; intau inta kinotabi-Mu diábí pinomayá-Mu mako in moyopú.

¹¹ Sinundú-Mu kon inakó in daḷan kobiagan; kon ini-Mu akuoi mokouḻí kon pia in gina inta diá in poḻiuan bo pia in gina modapot in mononoi.