MAZMUR 149 - Alkitab Singog In Mongondow Masa In Tanaa

Dondong dodayow

¹ Dayowdon in ki Tuhan! Podondongdon in dondong mobagu kon i Tuhan, dayowdon in Sia kon bonu in poyodungkuḷan in umat-Nea!

² Koḷungangadon in gina popisí in Momomaḻímu; koḷungangadon, ei intau inta nogutun kon Sion popisí in Datumu!

³ Dayowdon in tangoi-Nea pongin tayok mita, dayowdon in Sia in kecapi bo rebana!

⁴ Ki Tuhan in moibog kon umat-Nea; pinountung-Nea in intau inta moompá in dodia.

⁵ Biódon mako in umat i Allah in mopia in gina popisí in koḷoḷoben in kawasa-Nea, bo modondong takin ḷunganga in gina kinoouput in doḷom.

⁶ Biódon mako mosia in modondong kon i Allah takin singog moḷangon, kokada-kadai in kedang inta ain inatá

⁷ sin motuḻí kon bangusa mita, bo mohukum kon suku mita in bangusa;

⁸ bo motokig kon datu mita, bo motogot in rante kon mongongawasa mita monia;

⁹ bo mohukum kon bangusa mita podoyon kon parenta i Allah, Tuata in kinountungan in umat inta kinotabi-Nea. Dayowdon in ki Tuhan!