MAZMUR 148 - Alkitab Singog In Mongondow Masa In TanaaḶangit bo butá, dayowdon in ki Tuhan ! 1 Dayowdon in ki Tuhan! Dayowdon in ki Tuhan, ei tombonu in soroga! Bayongan inta nogutun kon tampat moḷantud, dayowdon in Sia! 2 Dayowdon in Sia, ei bayongan in malaekat-Nea, dayowdon in Sia, ei bayongan in tontara in soroga! 3 Dayowdon in Sia, ei mata in singgai bo buḷan, dayowdon in Sia, ei tundi mita inta moriang mako! 4 Dayowdon in Sia, ei ḷangit inta totok in moḷantud, dayowdon in Sia, ei tubig kon ḻimonikan in ḷangit! 5 Biódon mako in mosia komintan in modayow kon tangoi Tuhan, sin bayongan tua binaḻí podudui in parenta-Nea. 6 Sinantú-Nea in tampat kon batúannea, atorang-Nea in paké modapot in mononoi. 7 Dayowdon in ki Tuhan, ei tombonu in dunia, ei naga mita in dagat bo bayongan in baḷangon; 8 ei kilat bo uyan eis, salju bo goḷom, deḷang motorú inta dinumudui kon parenta i Tuhan! 9 Dayowdon in Sia, ei tombuḷud mita bo bayongan in buḷud, pangkoi in ayop mita bo bayongan in kayuon; 10 bayongan in bobiagon bo mahaḷuk ḻindong, bayongan in mahaḷuk ḷumandai bo ḷagapan! 11 Dayowdon in Sia, ei datu mita bo bayongan in bangusa, intau mita moḷoben bo bayongan in mongongawasa; 12 bayongan in tayowmobiag bo mongodeaga, guyanga bo intau moguod. 13 Biódon mako in mosia komintan modayow kon tangoi Tuhan, sin tangoi-Nea in moḷantu-ḷantud nongkon bayongan in tangoi; koḷoḷantud-Nea in nonigad kon ḷangit bo butá. 14 Sia in noginropotdon kon bangusa-Nea, dá Sia in dinayo-dayowdon in umat-Nea, Israel, umat inta totok in kinotabi-Nea. Dayowdon in ki Tuhan! |
Alkitab Singog In Mongondow Masa In Tanaa © Indonesian Bible Society, 2016.
Indonesian Bible Society