MAZMUR 147 - Alkitab Singog In Mongondow Masa In Tanaa

Dayow kon i Allah Inta totok in Mokawasa

¹ Dayowdon in ki Tuhan! Sin mopiabí totok in modayow kon i-Nia, bo mokosanangbí in mopodondong in dondong dodayow kon i-Nia!

² Ki Tuhan in mopoguḻitbí in Yerusalem; intau mita inta iḷumbú in diaan-Neabí mobui.

³ Sia in mongundam kon intau inta kinobuḻian in kamang, bo mobakut kon kekeb mita monia.

⁴ Sia in nonantú kon kobayong in tundi kon ḷangit, bo kon batúannea sinontangoian-Nea.

⁵ Totuubí kon moḷoben bo motoyang in ki Tuhan naton, kobobijaksana-Nea in diábí in imbuitnea.

⁶ Sia in noposindog in intau inta dinorot, táe intau moraat in pogambat-Nea kon butá.

⁷ Podondongdon in dodayow kon i Tuhan, pogogitogdon in kecapi kon i Allah naton.

⁸ Siabí in nopoukat in goḷom kon ḷangit; Sia in nosadia kon uyan poonag kon butá, bo nomiag bui kon bonok kon tombuḷud.

⁹ Sia in nopokaan kon bobiagon, bo kon adí in ḷagapan kawag inta kumarakmai mogoiní.

¹⁰ Kinosanang in gina i Tuhan in deemanbí kabaḷo inta moropot; deemanbí doman pojuang inta mobarani.

¹¹ Mopia in gina i Tuhan kon intau inta motoguondok, kon intau inta umuran mongamang mako kon tabi-Nea.

¹² Dayowdon in ki Tuhan, ei Yerusalem! Dayowdon in ki Allahmu, ei Sion!

¹³ Sin Sia in noginrigon kon bonawangmu mita, bo momarakat kon intaumu.

¹⁴ Sia in noḷukad kon butámu sinbá umuran moaman, bo mopokaan in gandum inta totok in mopia kon inimu modapot in mobotug.

¹⁵ Sia in nomarenta kon butá, bo tosingogon-Nea ḷagidon aidan.

¹⁶ Sia in mopoonag in salju naonda bo kapot, bo moporarit in oḷú nokompoḷ naonda bo ḷobud.

¹⁷ Sia in mopoonag in uyan eis naonda bo batu mongointok; diábí in mokoigon in monahang kon tumpingnea.

¹⁸ Bo pinodoyon kon parenta-Nea eis tatua in notatom; Sia in nopoirup in tompot, dá tubig in noiḻig domandon.

¹⁹ Sia in nopotaau in koyow-Nea kon umat-Nea, atorang bo hukum-Nea kon umat inta piniḻí-Nea.

²⁰ Diábí intua inaidan-Nea kon bangusa mita ibanea, mosia in diábí nonotaau in hukum-Nea mita. Dayowdon in ki Tuhan!