MAZMUR 146 - Alkitab Singog In Mongondow Masa In Tanaa

Dayow kon i Allah mopoposaḷamat

¹ Dayowdon in ki Tuhan! Ei jiwaku, dayowdon in ki Tuhan!

² Akuoi in moibog modayow kon i Tuhan kon kinoouput in kobiaganku bo modondong kon i Allahku kon dodai in oyúonpa in akuoi.

³ Dikadon mongamang kon mongongawasa, kon intau inta diá mokoposaḷamat.

⁴ Aka mosia matoi, mosia in buibí mobaḻí butá; singgai doman tatua bayongan in tomayá monia modait.

⁵ Pia in kamang in intau inta mopongata kon i Tuhan Allahnea, bo ki Allahnea in ki Allah i Yakub saḷaku mototuḷungnea.

⁶ Siabí inta ain nomaḻí kon ḷangit bo butá, dagat bo bayongan in tombonunea; Sia in umuranbí mosatia modapot in mononoi.

⁷ Sia in moduḷu kon hak in intau mita inta sinoko dorot, bo mobogoi in kaanon kon intau inta ginogoi. Ki Tuhan in mopoḷuai kon intau mita inta pinonjara,

⁸ bo mobuká kon mata in intau bilog. Sia in moposindog kon intau inta noḷabú, bo motabi kon intau inta mojujur.

⁹ Sia in moḷukad kon intau ango-angoi; Sia in motuḷung kon boba-bobay bo uno-unon, táe moḷamboi kon tomayá in intau moraat.

¹⁰ Ki Tuhan tua in Datu modapot in mononoi. Ei Sion, ki Allahmu nongawasa kinoouput in dunia naa. Dayowdon in ki Tuhan!