MAZMUR 140 - Alkitab Singog In Mongondow Masa In Tanaa

Sambayang mokiḷukad

¹ Kon i itoi in mododondong. Mazmur i Daud.

² Poḷuatdon in akuoi nongkon intau moraat, o Tuhan, ḷukadaidon in akuoi nongkon intau inta moḻingá.

³ Mosia in monomayá kon inta moraat kon bonu in gina, bo pomuḷoi in singgai mokopomuká kon bobayowan.

⁴ Dilá monia in naonda bo uḷag mobisa, tosingogon mita monia in naonda bo rasum in uḷag upu-upung.

⁵ O Tuhan, ḷukadaidon in akuoi nongkon kawasa in intau moraat, ḷukadaidon in akuoi nongkon intau inta moḻingá inta moniat mopoḷabú kon inakó.

⁶ Intau mokaḷakuang umado-adop in motaan kon potait kon inakó, bo mobukayad kon pukot sin podomok kon inakó. Kinoouput in daḷan mosia in motaan kon poyogaḷap sin modomok kon inakó.

⁷ O Tuhan, gumanku: Ikobí in ki Allahku, indongogaipa kaasí in sambayang oigumku.

⁸ Tuhan, Allahku, mopoposaḷamatku inta moropot, Iko in nogoḻingoidon kon inakó kon bonu in parang.

⁹ Dikabí duduian in ibog in intau moraat, o Tuhan, dikabí pomayá mako in tomayá monia tua motuoi.

¹⁰ Dikabí pomayá mako in musungku mountung; biódon mako in tosingogon mita moraat inta siningog monia moiuma kon i monia inta noponapud in uboḷ kon inakó.

¹¹ Biódon mako mosia in kotampurangan baga in tuḷú, bo pinogonag kon bonu in bubú in popatoi, dá diádon mokoḷuai bui.

¹² Biódon mako in intau inta moḻingá koantugan in bodito, dikadon pomayá mako in mopoponapud in uboḷ mogutun kon butá.

¹³ Kinotaauanku kon Iko in mobogoibí in inta moadil kon intau inta dinorot, bo moduḷu kon pelekara in intau nobogá.

¹⁴ Intau mojujur in modayowbí kon ini-Mu; mosia in mogutunbí moyotakinmu.