MAZMUR 14 - Alkitab Singog In Mongondow Masa In Tanaa

Kororaat in intau

¹ Kon i itoi in mododondong. Mazmur i Daud. Intau dondunguḷ in mosingog kon bonu in gina, “Diábí in ki Allah.” Aid monia in moraat bo moḻingá diá in mogaid kon inta mopia.

² Nongkon Soroga ki Tuhan moindoi kon umat intau sin motayak kon intau mobijak inta mosumba kon i-Nia.

³ Táe bayongan in intau ain sinumabat bo moraat, diádon tobatúmai in intau in nogaid kon inta mopia.

⁴ Guman i Tuhan, “Diádon degá noratak in intau mita tatua? Mosia in nobiag takin nogagow kon umat-Ku bo diábí kon dodai in onda in noigum pinongin sambayang kon i-Nakó.”

⁵ Intau moraat in totokbí in angoian in ondok, sin ki Allah in moḷukadbí kon intau inta motoindudui kon i-Nia.

⁶ Intau moraat in moibogbí moḷamboi kon intau nobogá, táe ki Tuhan in nobaḻí moḷoḷukadnea.

⁷ Igumon mako nongkon Sion mamangoi in kasaḷamatan kon Israel! Dá buí i Yakub in koangoianbí in ḷunganga in gina aka ki Tuhan mopoguḻídon in kobiagan in umat-Nea.