MAZMUR 139 - Alkitab Singog In Mongondow Masa In Tanaa

Ki Allah in totokbí in nonotaau bo noḷukad kon bayongan yagi-yagi

¹ Kon i itoi in mododondong. Mazmur i Daud. O Tuhan, kinodoḷopan-Mu in ginaku bo kinotaauan-Mu in akuoi.

² Kinotaauan-Mu in bayongan in aidku; nongkon noyayú kinomangaḻean-Mu in raianku.

³ Inontong-Mu in akuoi, pinomayá akuoi nogaid andeka nogogai, Kinotaauan-Mubí in bayongan inta pinomiaku.

⁴ Nodapot in diápa akuoi nosingog, kinotaauan-Mu onu in singogonku.

⁵ Iḻibu-Mu in akuoi nongkon bayongan in tampat, bo iḷukadan-Mu in akuoi in kawasa-Mu.

⁶ Moiḻiu in ako kon inakó in sinotaau-Mu tatua, diábí kogawadan in raianku.

⁷ Kon onda in bayáanku sinbá moisimparut kon kawasa-Mu? Kon onda in motaau poḷaguianku yumayú kon tayowon-Mu?

⁸ Aka akuoi mamonik in ḷangit, kon tua in Iko, aka akuoi mosiug kon dunia in popatoi, yo kon tua doman in Iko.

⁹ Aka akuoi ḷumayug mongin pomukaan andeka kibio-biómai kon popod in toyopan inta totok in moyayú,

¹⁰ Kon tua doman Iko in motuḷung kon inakó; kon tua doman in ḻima-Mu mokapit kon inakó.

¹¹ Aka poigumonku sinbá sindip moikoḷubung kon inakó, bo bayag kon diugkumai mobaḻí modoḷom,

¹² yo doḷom tatua in diábí mokosindip kon ini-Mu; doḷom tatua in mobayag naonda bo singgai, bo sindip tatua in naonda bo bayag.

¹³ Iko in nomaḻí kon batúan in awakku, bo nomia kon inakó kon bonu in bobuḷadían i ináku.

¹⁴ Akuoi in modayow kon ini-Mu sin akuoi in diá in poḻiuan! Bayongan in aid-Mu in mokoherang bo mokotongaw, totokbí in kinotaauanku intua.

¹⁵ Kon tungkuḷ in tuḷanku mita pinomia, takin pandoi pinipid kon bonu in bobuḷadían i ináku, kon dodai in akuoi nobiag noiadop kon tua, akuoi in diábí noiadop kon ini-Mu.

¹⁶ Iko in nokoontongbí kon inakó kon tungkuḷ in akuoi kon bonupa in bobuḷadían; komintanbí pinais kon bonu in buk-Mu; singgainea mita in sinantú bidon kon tungkuḷ in diápa tobatúmai in pinangkoi.

¹⁷ Totuu moyoyiga raian-Mu kon inakó, o Allah, bo totuubí mobayong in koantónea!

¹⁸ Aka iyaponku, yo mobayo-bayong bí kon bungaion; aka akuoi mobangon, umuranpabí doman raionkumai in Iko.

¹⁹ Igumon mako intau moraat yompaton-Mu, o Allah, poyayúdon in moḷoḻimod nongkon inakó!

²⁰ Mosia in nosingog kon moraat soaḷ Iko, bo ki ubo-uboḷmai nongibot pinodoyon kon kotá-Mu mita.

²¹ O Tuhan, kinodoí-Mu in intau inta mondoí kon ini-Mu, moyaat in ginaku kon intau inta moḷawang kon ini-Mu!

²² Mosia in totokbí in doí bo inanggapkubí musung.

²³ Tarididon in akuoi o Allah, doḷopdon in ginaku, tungkuḷaidon bo pokotaaudon in raianku.

²⁴ Indoiaika mongo oyúon in moraat kon bonu in awakku, bo diádon in akuoi kon daḷan inta mononoi.