MAZMUR 138 - Alkitab Singog In Mongondow Masa In Tanaa

Sambayang sukur

¹ Nongkon i Daud. O Tuhan, akuoi in moibog mopoyaput in sukur kon ini-Mu, takin ḻimbatú in ginaku. Kon tayowon in bayongan dewa podondongku in dayow kon ini-Mu.

² Tumungkud in akuoi tumayow kon Baḷoi-Mu inta motusi poḷat modayow kon tangoi-Mu, sin Iko in mosatia bo umuran motabi. Iko in mopounabí in dandi-Mu nongkon onu in pinoguman in intau soaḷ Iko.

³ Kon tungkuḷ in akuoi nokuani kon ini-Mu, Iko in notubag, inirigonan-Mu in ginaku dá nobaranidon in akuoi.

⁴ Bayongan in datu kon dunia in modayowbí kon ini-Mu, o Tuhan, sin mosia in nokodongogdon kon dandi-Mu.

⁵ Podondongbí monia onu in inaidan-Mu bo koḷoḷantud-Mu inta moḷoben.

⁶ Iko in totokbí in momulia, táe inta noempeng in inindoian-Mubí doman; intau moḷoḷatú in diábí mokopogadop kon ini-Mu.

⁷ Kon tungkuḷ in akuoi kinoantugan in susa, Iko in noḷukad kon kobiaganku. Iko in nonayow kon musungku inta koyogot in sinumorú bo pinosaḷamat-Mu in akuoi pinongin kawasa-Mu.

⁸ Iko in mogintompodbí kon dandi-Mu kon inakó; dikabí mogogai in motuḷung kon umat-Mu.