MAZMUR 137 - Alkitab Singog In Mongondow Masa In Tanaa

Amui kon bingkí in ongkag mita in Babel

¹ Kon bingkí in ongkag mita in Babel kami in iḻimitú bo mongombaḷ aka mokotorop kon Sion.

² Kon pangkoi mita in gandarusa kon butá tatua binambé nami in kecapi nami.

³ Intau mita inta nodakop kon inami nopotabá kon inami mopodondong kon i monia. Intau mita inta nondorot kon inami nokipodondong in dondong kon inami in mokosanang kon gina, “Popodondongdon kon inami in dondong mita nongkon Sion!”

⁴ Yo degá kon butá in intau kami in modondong kon i Tuhan?

⁵ Biódon mako akuoi diádon motaau modondong aka koḻiongankudon in iko, Yerusalem!

⁶ Biódon mako akuoi diádon motaau modondong aka koḻionganku in iko bo diádon in iko kinoibogku!

⁷ O Tuhan, toropdon in aid mita in intau in Edom kon tungkuḷ in Yerusalem iyompat. Mosia in noguman, “Umpagdon, umpagdon dapot in apadnea mita!”

⁸ Ei Babel, iko in yopúonbí! Pia in kamang in intau inta motuḻí kon inimu aid moraat inta pinopoaidmu kon inami.

⁹ Pia in kamang in intau inta nogamá kon adímu mita mointok bo nopogonag kon buḷud batu!