MAZMUR 136 - Alkitab Singog In Mongondow Masa In Tanaa

Dondong sukur

¹ Posukurdon kon i Tuhan, sin Sia in mopia; tabi-Nea dapot in mononoi.

² Posukurdon kon i Allah Inta Totok in moḷantud; tabi-Nea in umuran mononoi.

³ Posukurdon kon i Tuhan Inta Totok in moḷoben; tabi-Nea in umuran mononoi.

⁴ Tongábí Sia in mogaid kon inta mokoherang mita moḷoben; tabi-Nea in umuran mononoi.

⁵ Pinongin kobobijaksana-Nea Sia in nomaḻí kon ḷangit; tabi-Nea in umuran mononoi.

⁶ Inukat-Nea in butá kon tudu in tubig; tabi-Nea in umuran mononoi.

⁷ Sia in nomia kon pakakat mita ponimbayag kon ḷangit; tabi-Nea in umuran mononoi;

⁸ mata in singgai mongawasa kon singgai; tabi-Nea in umuran mononoi;

⁹ buḷan bo tundi inta mongawasa kon doḷom; tabi-Nea in umuran mononoi.

¹⁰ Iḻimod-Nea in adí mita guya-guyang in Mesir; tabi-Nea in umuran mononoi.

¹¹ Israel in inatod-Nea iḻumuai nongkon Mesir; tabi-Nea in umuran mononoi;

¹² pinongin ḻima inta moropot bo motorindog; tabi-Nea in umuran mononoi.

¹³ Dagat in Gelagah binotak-Nea; tabi-Nea in umuran mononoi;

¹⁴ Israel umat-Nea in dinia-Nea pinoḷoḷan; tabi-Nea in umuran mononoi.

¹⁵ Táe datu in Mesir bo tontaranea in iḷomot-Nea; tabi-Nea in umuran mononoi.

¹⁶ Dinia-Nea in umat-Nea nongin padang gurun; tabi-Nea in umuran mononoi.

¹⁷ Sinaḷow-Nea in datu mita inta mongotorindog; tabi-Nea in umuran mononoi;

¹⁸ iḻimod-Nea in datu mita inta ponango-nangoian; tabi-Nea in umuran mononoi.

¹⁹ Ki Sihon, datu in Amori; tabi-Nea in umuran mononoi;

²⁰ bo ki Og, datu in Basan; tabi-Nea in umuran mononoi.

²¹ Butá monia in inogoi-Nea kon umat-Nea; tabi-Nea in umuran mononoi;

²² mobaḻí kapunyaan in Israel mogogundoi-Nea; tabi-Nea in umuran mononoi.

²³ Sia in diábí nokoḻiong kon i naton kon tungkuḷ in kita sinaḷow; tabi-Nea in umuran mononoi.

²⁴ Pinoḷuat-Nea in kita nongkon kawasa in musung; tabi-Nea in umuran mononoi.

²⁵ Kon batúan in inta nobiag inogoian-Nea in kaanon; tabi-Nea in umuran mononoi.

²⁶ Posukurdon kon i Allah inta nongawasa kon ḷangit; tabi-Nea in umuran mononoi.