MAZMUR 135 - Alkitab Singog In Mongondow Masa In Tanaa

Dondong dodayow

¹ Dayowdon in ki Tuhan! Dayowdon in tangoi Tuhan, ei moiko mogogundoi-Nea mita

² inta nogundoi kon Baḷoi Tuhan kon pinogutunan i Allah naton.

³ Dayowdon in ki Tuhan, sin Sia in mopia, dayowdon in tangoi-Nea, sin Sia in mopia in gina.

⁴ Ki Yakub in piniḻí-Nea kon i-Nia, umat in Israel binaḻí kapunyaan-Nea.

⁵ Sin kinotaauanku kon ki Tuhan in totuubí kon moḷoben, Sia in moḷantud noiḻiu kon bayongan in dewa.

⁶ Sia in nogaid kon onu in kinoibog-Nea, kon ḷangit bo kon butá, kon dagat bo kon baḷangon inta modaḷom.

⁷ Nongkon popod in butá Sia nopoangoi in goḷom, pinomia-Nea in kilat kon uyan. Bo pinarentaan-Nea in tompot sinbá ḷumuai nongkon tampat pinotagúan-Nea.

⁸ Kon Mesir Sia in noḻimod kon bayongan in adí guya-guyang pinangkoi kon intau nodapot in bobiagon.

⁹ Kon tua nobayong in inaidan-Nea in mokoherang bo tomponuot sin mohukum kon datu bo bayongan in pogawainea,

¹⁰ Sia in noyopú kon nobayong in bangusa, bo noḻimod kon datu mita inta mongotorindog:

¹¹ ki Sihon datu in Amori bo ki Og datu in Basan, bo bayongan in datu kon Kanaan.

¹² Bo butá monia in inogoi-Nea nobaḻí kapunyaan in Israel, umat-Nea.

¹³ O Tuhan, Iko in umuranbí potaa-taau mako, bo tangoi-Mu in sinorop in bayongan in buí,

¹⁴ sin Iko in nobogoidon in inta moadil kon umat-Mu, bo nonotabi kon mogogundoi-Mu mita.

¹⁵ Berhala monia in nongkon buḷawan bo saḷaka, mia in intau.

¹⁶ Mosia in kobibig, táe diábí mokosingog, oyúon in mata, táe diá mokoontong.

¹⁷ Mosia in kobongoḷan, táe diá mokodongog, nongkon bibignea diábí ḷumuai in tompot poginaan.

¹⁸ Igumon mako natua in ukur in intau mita inta nomia kon tua, bo inta mopirisaya kon inia.

¹⁹ Dayowdon in ki Tuhan, ei umat in Israel, dayowdon in Sia, ei imang mita i Allah!

²⁰ Dayowdon in ki Tuhan, ei intau mita in Lewi, dayowdon in Sia, moiko komintan inta motoguondok.

²¹ Dayowdon in ki Tuhan kon Sion, kon Yerusalem tampat pinogutunan-Nea. Dayowdon in ki Tuhan!