MAZMUR 132 - Alkitab Singog In Mongondow Masa In Tanaa

Dodayow kon Baḷoi Tuhan

¹ Dondong mayá in Baḷoi Tuhan. O Tuhan, toropdon in ki Daud, bo bayongan in roriganea.

² Dikabí kaasí koḻiongan in sumbanea kon ini-Mu Tuhan, bo dandinea kon ini-Mu Inta Totok in moropot, Allah i Yakub.

^3-4 Gumannea, “Akuoi in diábí mogogai kon baḷoiku andeka mosiug kon tosiuganku,

⁵ kon dodai in diápa moposadia in baḷoi kon i Allah i Yakub, pogogutunan i Tuhan Inta Totok in moropot.”

⁶ Kon Betlehem dinongog naton soaḷ Poti Dodandian, bo nouḻí kon rawang in Yaar.

⁷ Igai mayá in kita kon tampat pogogutunan i Tuhan, bo mosumba kon i-Nia kon tayowon in pomomarentaan-Nea.

⁸ Angoidon bo pogutundon kon Baḷoi-Mu, o Tuhan, moyotakin in Poti Dodandian, tomponuot in kawasa-Mu.

⁹ Igumon mako in umat-Mu monggiow pia in gina, bo imang-Mu mita in umuran mobiag podudui in ibog-Mu.

¹⁰ Podoyon kon i Daud mogogundoi-Mu, dika kaasí indoíon in datu inta piniḻí-Mu.

¹¹ Ki Tuhan in nongibotdon kon i Daud; Sia in diábí monginggamá kon dandi-Nea. Guman-Nea, “Ki adímu tobatú in baḻíon-Kubí datu sin momarenta monoḻiu kon inimu.

¹² Aka ki adímu mita motoḷutui kon dodandian-Ku, bo motoindudui kon parenta-Ku mita, dá modapot in mononoi buí monia in monoḻiu kon ini-Mu mobaḻí datu.”

¹³ Sin ki Tuhan in nomiḻídon kon Sion; Kinoibog-Nea mobaḻí tampat pogogutunan-Nea.

¹⁴ Guman-Nea, “Kon tanaaya in pogogutunan-Ku modapot in mononoi, Akuoi in moibog momarenta kon tampat tanaa.

¹⁵ Bayongan in kaparaḷuannea in ogoi-Kubí kobayongon, intaunea mita inta nobogá in pokaanon-Kubí modapot in mobotug.

¹⁶ Imangnea mita in mopoontongbí in kasaḷamatan nongkon i-Nakó; umatnea in modondongbí bo monggiow pia in gina.

¹⁷ Kon naa buí i Daud tobatú in baḻíon-Kubí datu; pomomarentaannea in irigonan-Kubí.

¹⁸ Dodatuannea in umuranbí mobiag mooyúon, táe musungnea mita in pokopooyáanbímai.”