MAZMUR 131 - Alkitab Singog In Mongondow Masa In TanaaUmandoḷ kon i Tuhan 1 Dondong i Daud mayá in Baḷoi Tuhan. Tuhan, akuoi in diábí mododia, bo diábí moḷoḷatú. Akuoi in diábí mogaḷow kon inta moiḻiu in ḷoben andeka inta moiḻiu in roriga batukonku. 2 Totuubí, kon ginaku naa in moonowbí bo moodom; naonda bo adí mointok inta bagu noneté, mopia in siug kokoyo-koyot i inánea, ná tatua in koonow in ginaku. 3 Pongamangdon kon i Tuhan, ei umat-Nea, tanaa mako modapot in mononoi. |
Alkitab Singog In Mongondow Masa In Tanaa © Indonesian Bible Society, 2016.
Indonesian Bible Society