MAZMUR 130 - Alkitab Singog In Mongondow Masa In Tanaa

Sambayang kon bonu in susa

¹ Dondong mayá in Baḷoi i Tuhan. Nongkon bonu in irang roriga akuoi in nokuani kon ini-Mu, o Tuhan.

² Tuhan, indongogaipa kaasí in kuaniku, indongogaipa kaasí in oigumku.

³ Aka umuran toropon-Mu in dosa nami, o Tuhan, ki inebí in mokotongod?

⁴ Táe Iko in moibog mongampung, sinbá intau in mobaḻí motoguondok.

⁵ Akuoi in mogoḷat mako kon totuḷung i Tuhan, dandi-Nea in inamangku mako.

⁶ Akuoi in mokotanob kon i Tuhan, noiḻiu kon tanob in moḷoḷukad doḷom kon mobayagdon.

⁷ Pongamangdon kon i Tuhan, ei umat-Nea, sin Sia in umuranbí motabi, bo umuranbí nosadia moposaḷamat.

⁸ Sia in mopoḷuatbí kon i naton nongkon bayongan in taḷá naton.