MAZMUR 13 - Alkitab Singog In Mongondow Masa In Tanaa

Sambayang in intau inta dinorot

¹ Kon i itoi in mododondong. Mazmur i Daud.

² Modapot in toonu koḻiongan-Mu in akuoi kaasí Tuhan? Modapot in toonu Iko in mogadop kon inakó?

³ Modapot in toonu in akuoi musti mobaba kon roriga, bo moajar in gina kinoouput in singgai? Modapot in toonu akuoi kawasaan in musung?

⁴ Indoiaidon in akuoi, kaasí o Tuhan Allahku, tubagaipa kaasí in sambayangku. Poguḻídon in ropotku, bo dikadon pomayá mako in akuoi matoi.

⁵ Dika pomayá mako in musungku in moguman kon mosia in nonaḷowdon kon inakó. Dikabí pomayá mako in akuoi goḷokapan monia.

⁶ Sin akuoi in mopongata in tabi-Mu, dá moḷunganga in akuoi sin Iko in noposaḷamat kon inakó. Akuoi in moibog mopoyaput in dondong kon i Tuhan, sin Sia in nopoaid in mopia kon inakó!