MAZMUR 129 - Alkitab Singog In Mongondow Masa In Tanaa

Mokituḻí kon aid musung

¹ Dondong mayá in Baḷoi Tuhan. Israel, pogumandon mongo naonda in pinomomogutú in musung kon inimu pinangkoi kon iko nobagupa.

² “Akuoi in pinogutú in musung pinangkoi kon nobagupa in akuoi, táe mosia in diábí nokotaḷow kon inakó;

³ mosia in nonongkekeb kon ḻikudku, naonda bo momomajeko nonongkaḻembong kinoḷanggó kon gobá.

⁴ Táe ki Tuhan inta moadil nopoḷuatdon kon inakó nongkon pinononggataan.”

⁵ Biódon mako bayongan in intau inta mondoí kon Sion taḷowon bo upeton dapot in umundok.

⁶ Biódon mako in mosia naonda bo bonok kon tudu in atop inta noingkagdon kon tungkuḷ in diápa nobiag;

⁷ Diábí in noratab kon inia, andeka notogot kon pomomotaanan.

⁸ Intau mita inta moitaḻib in diábí moguman, “Igumon mako iko in barakatan i Tuhan, kami in momarakat kon inimu kon bonu in tangoi Tuhan.”