MAZMUR 128 - Alkitab Singog In Mongondow Masa In TanaaBarakat kon tonibuḷoi 1 Dondong mayá in Baḷoi Tuhan. Pia in kamang in intau inta motoguondok bo nobiag noidudui kon parenta i Allah. 2 Iko in mongaanbí nongkon onu inta siniḷopíanmu, mobiag motomoman bo motompia. 3 Ki buḷoimu bobay in naonda bo pangkoi in anggur inta moḷumbá kon bonu in baḷoimu. Ki adímu mita in naonda bo poḻimping in pangkoi in zaitun kon ḻibu in mejamu. 4 Natuata in pomomarakat i Tuhan kon intau inta motoguondok. 5 Igumon mako nongkon Sion ki Tuhan in momarakat kon inimu. Igumon mako iko in mokoontong kon kobiagan motomoman kon Yerusalem kon bonu in iko mobiagpa! 6 Igumon mako iko in moumur in kobiagan, bo mokoontong kon adí bo ompumu! Igumon mako umat i Tuhan in mobiag motompia! |
Alkitab Singog In Mongondow Masa In Tanaa © Indonesian Bible Society, 2016.
Indonesian Bible Society