MAZMUR 126 - Alkitab Singog In Mongondow Masa In Tanaa

Sambayang mokopoḷuat

¹ Dondong mayá in Baḷoi Tuhan. Kon tungkuḷ in ki Tuhan nopoguḻí bui in kaadaan Yerusalem, kita in naonda bo sinogoindop!

² Kita in tantúbí kinumosing bo nodondong takin pia in gina dá bangusa mita ibanea in noguman, “Ki Tuhan in nogaidon kon inta mongotoyang kon i monia!”

³ Bo totuubí kon ki Tuhan in nogaidon kon inta mongotoyang kon i naton! Tuamai in mopia in gina naton!

⁴ O Tuhan, poguḻídon in kaadaan nami, naonda bo ongkag noingkag bo buidon oyúon in tubig kon tungkuḷ in uagat.

⁵ Igumon mako in intau inta noponimboi sindaḷan mongombaḷ, in mokoyut takin ḷunganga in gina.

⁶ Intau inta mayá moponimboi in batoḷ kon gobánea, takin tumomponggoḷuáanmai, yo notantú bidon kon sia in mobui sindaḷan modondong pia in gina kodia-dia in bungai in boyó mita.