MAZMUR 124 - Alkitab Singog In Mongondow Masa In Tanaa

Ki Allah in mogogoḻiung kon umat-Nea

¹ Dondong i Daud kon dodai in mayá in Baḷoi Tuhan. Naonda degá aka kuma bo ki Tuhan diá dumotá kon i naton? Ei Israel, tubagaidon nanaa:

² “Aka kuma bo ki Tuhan diá dumotá kon i naton kon tungkuḷ in kita tubuon in musung,

³ dá kita in iḻiom bidon ande sibiag, popisí in torú monia inta tumaga-tagabdon tua.

⁴ Dá kita in iniḻigdon in ḷunud, bo sinagom in tubig;

⁵ bo kita in minatoidon noḷomot kon ponangkaburowan in tubig inta mokoondok.”

⁶ Igai in kita mopoyaput in sukur kon i Tuhan, sin diábí pinomayá-Nea mako in kita iyopú in musung.

⁷ Kita in naonda bo ḷagapan inta nokobuḻi nongkon giman in mongonggiman, goguḷu tatua in nobontowdon, bo kita in nokobuḻidon!

⁸ Totuḷung naton in namangoi nongkon i Tuhan inta nomaḻí kon ḷangit bo butá.