MAZMUR 122 - Alkitab Singog In Mongondow Masa In Tanaa

Dodayow kon Yerusalem

¹ Dondong i Daud kon dodai in mayá in Baḷoi Tuhan. Mopia in ginaku kon tungkuḷ in intau moguman kon inakó, “Igai in kita mayá in Baḷoi i Tuhan!”

² Tanaa in kami moiyaputdon kon bonawang in kotá in Yerusalem.

³ Yerusalem inta pinosindog saḷaku kotá ginuntuḷ notompia bo mogaga.

⁴ Kon naa in angoian in bayongan in suku bangusa, suku mita in bangusa inta piniḻí i Tuhan, sin mopoyaput in sukur kon i-Nia podudui in parenta-Nea.

⁵ Kon naabí in datu mita buí i Daud mohakim kon rayatnea.

⁶ Posambayangdon kon kotompiaan in Yerusalem: “Igumon mako bayongan in intau inta moibog kon inimu in motompia.

⁷ Igumon mako oyúon in dodamean kon bonu in butámu, bo koodom kon bonu in bentengmu mita.”

⁸ Popisí in inanakan bo yobayatku akuoi in moguman, “Igumon mako iko in mobiag motompia!”

⁹ Podoyon kon Baḷoi Tuhan, Allah naton, akuoi in mosambayang sinbá mosanang in iko.