MAZMUR 121 - Alkitab Singog In Mongondow Masa In Tanaa

Ki Tuhan in moḷoḷukad naton

¹ Dondong mayá in Baḷoi Tuhan. Akuoi in inimindoi kon buḷud mita, nongkon onda in totuḷung kon inakó?

² Totuḷungku in mamangoi nongkon i Tuhan inta nomaḻí kon ḷangit bo butá.

³ Sia in diábí mopomayá mako kon inimu moḷabú, moḷoḷukadmu in umuranbí moḷukad mako.

⁴ Totuubí, moḷoḷukad in Israel tua diábí kon dodai in onda in tomposiug andeka moḷoḷot.

⁵ Ki Tuhan in moḷukadbí kon inimu, Sia in kon diugmubímai sin moḷukad kon inimu.

⁶ Iko in diábí motakit popisí in mata in singgai kon dodai in singgai, andeka popisí in buḷan kon dodai in doḷom.

⁷ Ki Tuhan in moḷukadbí kon inimu nongkon anib, Sia in moḷukad kon inimu sinbá kobiaganmu in mosaḷamat.

⁸ Sia in moḷukad kon inimu kon tungkuḷ in iko mamangoi bo mayá, tanaa mako modapot in mononoi.