MAZMUR 12 - Alkitab Singog In Mongondow Masa In Tanaa

Sambayang mokituḷung

¹ Kon i itoi in mododondong. Podudui in dondong inta in waḷunea. Mazmur i Daud.

² Tuḷungaipa kaasí in kami, o Tuhan, sin diádon in intau mopia, intau inta mosatia kon ini-Mu ain noyopú.

³ Mosia komintan mosiuboḷandon, mosiakaḷan pongin tosingogon inta mopia in kodongogan.

⁴ Popogogaidon in tosingogon mita inta modondouḷug tua, Tuhan, tukumaidon in intau mita inta moambungangaḷ,

⁵ inta moguman, “Kami in mongawasa takin dilá nami! Onukabí motaaubí singogon nami, bo diábí in mokoḷamboi!”

⁶ Guman i Tuhan, “Intau nobiag nobogá doroton bo intau mororiga mogamui. Dá tanaa doman Akuoi in namangoi mobogoi in kobiagan moodom inta kinoibog monia.”

⁷ Dandi i Tuhan moroton bo motaau pongata, naonda bo saḷaka taakan inta inuji kon bonu in tuḷú.

^8-9 Intau moraat modondaḷoi magí-mako, aid moraat duíon in bayongan in intau. Táe Iko in moḷukad kon inami, o Tuhan, ḷukadaipa in kami nongkon intau mita inta moraat tatua.