MAZMUR 119 - Alkitab Singog In Mongondow Masa In TanaaHukum i Tuhan Kopopia in intau inta motoindudui kon hukum i 1 Pia in kamang in intau inta nobiag diá in bogit bo notoindudui kon hukum mita i Tuhan. 2 Pia in kamang in intau inta dinumudui kon parenta-Nea, bo takin ḻimbatú in gina moḷongasi monotaau kon i Tuhan. 3 Pia in kamang in intau inta nobiag podudui in ibog i Tuhan, bo diá nogaid kon moraat. 4 Iko in nobogoi kon inami in hukum-Mu, o Tuhan, sinbá aidan nami intua takin mokopotoḷutui. 5 Igumon mako akuoi takin gina moroton dumudui kon atorang-Mu mita. 6 Aka akuoi monaridimai kon bayongan in parenta-Mu, dá akuoi in diábí pokopooyáanmai. 7 Aka balajaronku in pinononantú-Mu inta moadil, akuoi in modayow kon ini-Mu takin ḻimbatú in gina. 8 Akuoi in moibogbí dumudui kon hukum-Mu, dikabí kaasí mokoimontanmai in monaḷámai kon inakó. Motoindudui kon hukum i Tuhan 9 Intau moguodpa in mokoḷukadbí kon kobiagannea diá in bogit aka mobiag in sia podudui in parenta-Mu. 10 Takin ḻimbatú in gina akuoi moḷongasi monotaau kon ini-Mu, dikabí kaasí pomayá-Mu mako in akuoi in tumabat kon parenta-Mu. 11 Totundú in sinagúku kon bonu in ginaku, sinbá akuoi diá baradosaan kon ini-Mu. 12 Akuoi in modayow kon ini-Mu, o Tuhan, tundúdon in akuoi in atorang-Mu. 13 Noḷangon in singogku in nopotaau in bayongan in hukum inta inogoi-Mu. 14 Noḷunganga in ginaku in dinumudui kon parenta-Mu mita, naonda bo nokouḻí kon bayongan in kapunyaan. 15 Akuoi in moibog mobalajar kon bayongan inta sinantú-Mu, bo monaridi kon topotundú-Mu mita. 16 Atorang-Mu in nokosanang kon inakó; totundú-Mu in diábí koḻionganku. Ḷunganga in gina popisí in hukum i Tuhan 17 Igumon mako mopia in gina-Mu kon mogogundoi-Mu naa, sinbá akuoi in umuran mobiag bo dumudui kon totundú-Mu. 18 Bukádon in mataku sinbá mokoontong in akuoi kon totundú inta mokotongaw kon bonu in hukum-Mu. 19 Diábí umuran mako in akuoi in mogutun kon dunia dikabí kaasí bunion in hukum-Mu kon inakó. 20 Monakit in ginaku in monahang kon tanob, akuoi in moibog monotaau kon hukum-Mu pomuḷoi mako. 21 Iko in monoboḷow kon intau inta moḷoḷatú, bo nongutuk kon intau inta sinumabat kon parenta-Mu. 22 Poḷuatdon in akuoi kon singkuḻe bo rebeg monia, sin akuoi in nopobayá in atorang-Mu. 23 Umpakabí pongawasa mita moyopopog in monayow kon inakó, mogogundoi-Mu naa in umuranbí monano-nanob mako kon atorang-Mu. 24 Atorang-Mu mita in nobaḻí mononongginaku inta nokosanang kon ginaku. Ibog in gina dumudui kon hukum i Tuhan 25 Akuoi in inumuḻid mako kon ruak in ḷobud; poguḻídon in kobiaganku podudui in dandi-Mu. 26 Inakuku in aidku, bo Iko in notubag kon inakó; tundúdon kon inakó in atorang-Mu. 27 Tuḷungaidon in akuoi monotaau kon hukum-Mu mita, totundú-Mu inta mokotongaw in umuranku tano-tanobon. 28 Dimukudku in morumbun sin kinoantugan in susa, iropotaidon in akuoi podudui in dandi-Mu. 29 Poyayúdon in akuoi nongkon daḷan inta mokopoḷaḻe, popisí in kopopia-Mu, yo tundú kon inakó in hukum-Mu. 30 Piniḻíkudon kon motoindudui, parenta-Mu in umuran toroponku mako. 31 Akuoi in dinumuduidon kon atorang-Mu mita, o Tuhan, dika pomayá mako in akuoi in pokooyáanmai. 32 Takin pia in gina dumudui in akuoi kon parenta-Mu, sin binaḻí-Mu in akuoi totok in momangaḻe. Sambayang mopoigum in pomomangaḻe 33 Tuhan, tundúdon kon inakó in mangaḻe in atorang-Mu mita, sinbá dumudui in akuoi modapot in kopaḷutannea. 34 Popomangaḻedon kon inakó in hukum-Mu sinbá duduianku, bo aidanku takin ḻimbatú in gina. 35 Igumon mako akuoi in umuran kumadai totok kon parenta-Mu, sin tuabí in kinoibogku. 36 Ogoiaidon in akuoi in ibog dumudui kon atorang-Mu, moiḻiu kon ibog mobaḻí mooyúon. 37 Ḷukadai in akuoi sinbá diá momatuk kon inta diá in mangaḻenea, ogoiaidon in akuoi in kobiagan podudui in ibog-Mu. 38 Popogonúdon totok kon mogogundoi-Mu naa in dandi-Mu, inta ogoi-Mu kon intau inta motoḷutui kon ini-Mu. 39 Poyayúdon in singkuḻe inta kinoondokku, sin totuubí kon mopia in hukum-Mu. 40 Ogoiaidon in akuoi in kobiagan mobagu, sin Iko in moadil, totokbí in ibogonku in tumoḷutui kon atorang-Mu mita. Umandoḷ mako kon hukum i Tuhan 41 O Tuhan, poontongdon kon totuu motabi in Iko kon inakó, posaḷamatpa kaasí in akuoi podudui in dandi-Mu. 42 Dá mokotubagdon in akuoi kon intau inta moningkuḻe kon inakó, sin akuoi in mopongata in tosingogon-Mu. 43 Tuḷungaipa kaasí in akuoi sinbá umuran mosingog kon onu in totuu, sin akuoi in mogoḷat mako kon onu in tantúon-Mu. 44 Akuoi in moibog kumadai kon hukum-Mu, modapot in mononoi. 45 Dá mobiagdon in akuoi takin diá in ḷamboinea, sin moḷongasi dumudui kon totundú-Mu. 46 Atorang-Mu in potaaukubí kon datu mita, bo diábí in akuoi mooyá. 47 Inta mokoḷunganga kon inakó in mopobayábí in parenta-Mu, sin kinoibogku totok intua. 48 Horomatonku bo koibogku in parenta-Mu, atorang-Mu in umurankubí tano-tanobon. Mopirisaya kon hukum i Tuhan 49 Toropdon in dandi-Mu kon mogogundoi-Mu tanaa, dandi inta mobogoi in kamang kon inakó. 50 Naa inta mokoḻipoi kon inakó kon tungkuḷ in akuoi mororiga, sin dandi-Mu tatua in nobogoi in kobiagan kon inakó. 51 Intau moḷoḷatú in totokbí in moningkuḻe kon inakó, táe akuoi in diábí sinumabat kon hukum-Mu. 52 Kinotoropankubí in hukum-Mu inta oyúon nongkon dungkuḷpabímai, dá noḻipoidon in ginaku, o Tuhan. 53 Akuoi in sinumorúdon totok kon intau moraat, sin mosia in nonaḷámai kon hukum-Mu. 54 Kinoouput in kobiaganku inta motoyong naa kon dunia, atorang-Mu in baḻíonku dondong mita dodayow. 55 Kon dodai in doḷom kotoropanku in Iko, o Tuhan, hukum-Mu in umuranbí kadaianku. 56 Akuoi in nokouḻí kon ḷunganga in gina kon bonu in sinumoḷutui kon parenta-Mu mita. Tumoḷutui kon hukum i Tuhan 57 Tongábí Iko tontaní in koibogku, o Tuhan, akuoi in modandi kon mogaid kon onu in sinundú-Mu. 58 Takin ḻimbatú in gina akuoi mopoigum in totabi-Mu, kotabipa kaasí in akuoi podudui in dandi-Mu. 59 Akuoi in norai-raimaidon kon dodiaku, bo nodandi kon dumuduibí kon atorang-Mu. 60 Akuoi in ḻimikatbí bo diábí mogoḷat sin mopobayá in parenta-Mu. 61 Intau moraat motaan kon potait kon inakó, táe akuoi in diábí mokoḻiong kon hukum-Mu. 62 Moonggot kon doḷom mobangon in akuoi sin modayow kon ini-Mu, popisí in pononantú-Mu mita inta moadil. 63 Akuoi in noyobayat in bayongan in intau inta motoguondok, bayongan in intau inta nogaid kon parenta-Mu, 64 Butá nopuḻing in tabi-Mu, o Tuhan, tundúdon kon inakó in atorang-Mu mita. Mangaḻe in hukum i Tuhan 65 Iko in nogintompodon kon dandi-Mu, o Tuhan, bo nopoaid in inta mopia kon mogogundoi-Mu. 66 Ogoiaidon in akuoi in hikmat bo totaau, sin akuoi in mopirisaya kon parenta-Mu mita. 67 Kon dodai in diápa ihukum, akuoi in sinumabat, tanaa in akuoi kinumadai kon parenta-Mu. 68 Sin Iko in mopia bo nopoaid in mopia, tundúai in akuoi in atorang-Mu mita. 69 Intau moḷoḷatú noningkuḻe kon inakó, táe noḻimbatúbí in ginaku in sinumoḷutui kon atorang-Mu. 70 Intau mita tatua in diábí nomangaḻe, táe kon inakó hukum-Mu in mokosanangbí kon gina. 71 Totuubí kon mopiabí in Iko in nohukum kon inakó, sinbá kotaauankudon in atorang-Mu mita. 72 Kon inakó in hukum-Mu in mopia-pia nongkon bayongan in buḷawan bo saḷaka kon dunia. Kooadil in hukum i Tuhan 73 Ikobí in nomaḻí bo nomia kon inakó, ogoiaidon in akuoi in pomomangaḻe sin mobalajar kon parenta-Mu mita. 74 Intau motoguondok in mosanangbí in ginanea aka mokoontong kon inakó, sin akuoi in mogoḷat mako kon dandi-Mu. 75 Kinotaauanku kon pinononantú-Mu in moadil o Tuhan, Iko in nohukumdon kon inakó popisí in kososatia-Mu. 76 Igumon mako tabi-Mu in nobaḻí ḷoḻipoiku, podudui in dandi-Mu kon mogogundoi-Mu. 77 Kotabipa kaasí in akuoi, dá umuran mobiag in akuoi, sin hukum-Mu in mokosanang kon ginaku. 78 Biódon mako in intau moḷoḷatú mooyá popisí in noponapudon in uboḷ kon inakó, táe akuoi in umuranbí monano-nanob kon parenta-Mu mita. 79 Igumon mako intau inta motoguondok mamangoi kon inakó, bayongan inta nonotaau kon atorang-Mu mita. 80 Igumon mako in ginaku diá tumabat nongkon atorang-Mu, sinbá diá mooyá in akuoi. Sambayang mopoigum poḷuaton 81 Ginaku in totokbí in mokotanob kon kasaḷamatan nongkon ini-Mu; akuoi in mogoḷat mako kon dandi-Mu. 82 Mataku moḷopí in mogoḷat mako kon ini-Mu mogintompod kon dandi-Mu, akuoi in noguman, “Toonubí degá in Iko in moḻipoi kon inakó?” 83 Kuḻitku in noḷubakdon naonda bo botutu in anggur inta ain nokoyongan, táe atorang-Mu in diábí koḻionganku. 84 Modapot in toonu kaasí in mogogundoi-Mu naa in musti mokopoigon kon gina? Toonu degá in Iko in mohukum kon intau mita inta nondudur kon inakó? 85 Intau inta diá dinumudui kon hukum-Mu, nongaḻidon kon bubú sinbá kotopakanku. 86 Bayongan in hukum-Mu in motaaubí pongata, tuḷungaipa kaasí in akuoi, sin akuoi in dinuduran táe diábí in kinodoyonan pinonduduran. 87 Gogió bo kinoḻimodandon monia in akuoi, táe diábí sinaḷáankumai in parenta-Mu. 88 Posaḷamatpa in akuoi sin Iko in umuranbí motabi kon inakó, sinbá akuoi in mokoduduidon kon hukum-Mu. Mopirisaya kon hukum i Tuhan 89 Tuhan, tosingogon-Mu in moroton modapot in kopaḷutannea, umuran mononoi kon soroga. 90 Kososatia-Mu in monahang kino ouput in wakutu, Pinotorindog-Mu in butá nodapot in umuran oyúon. 91 Bayongan inta oyúon tanaa mako, oyúon popisí in parenta-Mu, sin mosia in mogogundoi-Mubí mita. 92 Aka kuma bo hukum-Mu in deemanbí pinomangkoian in ḷungangaku, yo notantúbí kon minatoidon in akuoi kon bonu in rorigaku. 93 Modapotbí in mononoi in akuoi in diá monaḷámai kon parenta-Mu, sin tuabí in pinomiag-Mu kon inakó. 94 Posaḷamatdon kaasí in akuoi, sin akuoi naa Iko in kitogi, akuoi in noḷongasidon dinumudui kon atorang-Mu. 95 Intau moraat in mogoḷat mako sin moḻimod kon inakó, táe akuoi in moibogbí monaridimai kon hukum-Mu. 96 Inontongku kon inta notompodpa in oyúonbí in sigadnea, tongábí parenta-Mu in nosompurna. Ibog kon hukum i Tuhan 97 Totokbí in koibogku in hukum-Mu; umurankubí tano-tano bo kinoouput in singgai. 98 Umurankubí kotoropan in parenta-Mu, inta nokodugang kon kobobijaksanaku nongkon musungku mita. 99 Komomangaḻeku in noiḻiu kon komomangaḻe in guruku mita, popisí in akuoi umuran monano-nanobmai kon parenta-Mu mita. 100 Akuoi in motaa-taau in guyanga mita, sin akuoi in kinumadai kon atorang-Mu mita. 101 Iyumayú in akuoi kon bayongan in dodia, moraat, sinbá motoḷutui in akuoi kon totundú-Mu. 102 Diábí pomayáku mako in hukum-Mu, sin Ikobí in notundú kon inakó. 103 Totuu mopia in tosingogon-Mu, noiḻiu kon koromimit in biluk! 104 Hukum-Mu mita in nobogoi kon inakó in pomomangaḻe, dá doíbí in akuoi kon aid motombogá. Hukum i Tuhan mobogoi in bayag 105 Tosingogon-Mu in nobaḻí togá kon bayáanku, sindar inta monimbayag kon daḷanku. 106 Inta dinandiku pinodoyon kon ibot in intompodankubí, kon kumadai kon atorang-Mu inta moadil. 107 Akuoi in totokbí in mororiga, o Tuhan, ḷukadai in kobiaganku podudui in dandi-Mu. 108 Tarimapa kaasí in sambayang sukurku, o Tuhan, bo tundúdon in akuoi in hukum-Mu mita. 109 Akuoi in umuranbí moposarakan in kobiaganku, táe akuoi diábí mokoḻiong kon hukum-Mu. 110 Intau moraat in motaan kon poyogaḷap kon inakó, táe akuoi in diábí sinumabat kon atorang-Mu. 111 Parenta-Mu in bongkoḷku modapot in mononoi, inta nokoḷunganga kon ginaku. 112 Totokbí in kon ginaku in dumudui kon atorang-Mu, modapot in mopaḷut in kobiaganku. Hukum i Tuhan mokoodom 113 Akuoi in moibog totok kon hukum-Mu mita, kinodoíku in intau inta diá noḻimbatú in gina in dumudui kon ini-Mu. 114 Ikobí in mododuḷu bo mogogoḻingoiku, akuoi in mogoḷat mako kon dandi-Mu. 115 Ei intau moraat, pokoyayúdon kon inakó! Akuoi in moibogbí tumoḷutui kon parenta i Allahku. 116 Iropotai in akuoi podudui in dandi-Mu sinbá mobiag in akuoi, dika pomayá mako in akuoi in pokudaion kon bonu in akuoi nongamang. 117 Tonoidon in akuoi sinbá mosaḷamat in akuoi, bo umuran moindoimai kon parenta-Mu. 118 Iko in doíbí kon intau inta sinumabat kon atorang-Mu, diábí in mangaḻe in tombuḻitok monia. 119 Bayongan in intau moraat in inanggapkubí yoyatan, tuamai in akuoi in moibog kon atorang-Mu mita. 120 Akuoi in mourot popisí in moondok kon ini-Mu, ginaku in moondok kon atorang-Mu. Motoḷutui kon hukum i Tuhan 121 Akuoi in nogaidon kon inta moadil bo inta noitutui, dikabí kaasí ogoi in akuoi kon kawasa in musung. 122 Podandidon kon Iko in motuḷungbí kon inakó, dikabí pomayá mako in akuoi in doroton in intau mita mododia. 123 Mataku in mopomporí in mogoḷat mako kon totuḷung-Mu inta mokosaḷamat, inoḷatku mako in popoḷuatan inta pinodandi-Mu. 124 Popoaidon kon inakó podudui in tabi-Mu, bo tundúdon kon inakó in atorang-Mu. 125 Akuoi in mogogundoi-Mu, baḻídon in akuoi momangaḻe, sinbá komangaḻeanku in parenta-Mu. 126 Tuhan, wakutu-Mudon mopobayá in oaidan-Mu, sin intau mita iḻimimpatdon kon hukum-Mu. 127 Parenta-Mu mita in kinoibogku totok noiḻiu kon buḷawan taakan. 128 Tuamai akuoi in nobiag podudui in bayongan topotundú-Mu; dodia inta mobelung in kinodoíku. Ibog dumudui kon hukum i Tuhan 129 Atorang-Mu mita in totuu kon mokotongaw, dá dinuduianku takin ḻimbatú in gina. 130 Aka insilangan, totundú-Mu in mobogoi in bayag, mobogoi in pomomangaḻe kon intau moompá in gina. 131 Poginaanku in mopoina-inak, popisí in mokotanob kon parenta-Mu. 132 Bobuidon in akuoi bo kotabipa kaasí in akuoi, ná kototabi-Mu kon intau inta motabi kon ini-Mu. 133 Irigonaidon in ḷampangku podudui in dandi-Mu, dikabí pomayá mako kaasí in akuoi in kawasaan in moraat. 134 Poḷuatdon in akuoi nongkon intau mita inta mondorot kon inakó, sinbá akuoi in mokotoinduduidon kon atorang-Mu. 135 Barakataidon in akuoi podoyon kon koangoian-Mu, bo tundúdon in akuoi in atorang-Mu. 136 Ḷuáku in moiḻig naonda bo ongkag, popisí in hukum-Mu diá dinuduian. Hukum i Tuhan tua in moadil 137 Iko in moadil, o Tuhan, bayongan in hukum-Mu in noitongkaná. 138 Parenta mita inta inogoi-Mu in moadil bo motaau pongata. 139 Torúku in modokot kon bonu in ginaku popisí in musungku nokoḻiong kon totundú-Mu. 140 Dandi-Mu in motorindog bo motaau pirisayaan, totok in moibog in akuoi intua. 141 Akuoi naa in mointok bo noempeng, táe diábí sinaḷáanku in totundú-Mu. 142 Kooadil-Mu in umuran mononoi, hukum-Mu in umuranbí mobanar. 143 Akuoi in kinoantugan in roriga bo susa, Táe atorang-Mu in mokoḷunganga kon ginaku. 144 Atorang-Mu in umuran moadil; ogoiai in akuoi in pomomangaḻe sinbá mobiag in akuoi. Sambayang mokipoḷuat 145 Takin ḻimbatú in gina akuoi mokuani kon ini-Mu; tubagaipa kaasí in akuoi o Tuhan, akuoi in moibog dumudui kon parenta-Mu. 146 Akuoi in nokuani kon ini-Mu, posaḷamatpa kaasí in akuoi, akuoi in moibog kumadai kon atorang-Mu. 147 Doḷo-doḷom mobangon in akuoi bo mokuani mokituḷung; akuoi in mogoḷat mako kon dandi-Mu. 148 Kinoouput in doḷom moḷukad mako in akuoi, sin monano-nanob kon totundú-Mu. 149 Indongogaidon in akuoi popisí in tabi-Mu o Tuhan, ḷukadaipa kaasí in kobiaganku popisí in kooadil-Mu. 150 Intau inta mondudur kon inakó in nodiugdon, niat monia in moraat bo diábí nopandungmai kon hukum-Mu. 151 Táe Iko in nodiug, o Tuhan, bayongan in parenta-Mu in totuu. 152 Nongkon koḻipodpabímai kinotaauanku nongkon totundú-Mu mita, kon Iko in nonantúdon kon tua modapot in mononoi. Sambayang mokituḷung 153 Indoiaipa kaasí in rorigaku bo posaḷamatpa in akuoi, sin diábí sinaḷáanku in hukum-Mu. 154 Duḷuaidon in pelekaraku bo poḷuatdon in akuoi; posaḷamatpa in akuoi podudui in dandi-Mu. 155 Intau moraat in diábí posaḷamaton, popisí in diá dinumudui kon atorang-Mu. 156 Totuu moḷoben in totabi-Mu, o Tuhan, posaḷamatpa in akuoi podudui in kooadil-Mu. 157 Nobayong in intau in nosaturu bo nondudur kon inakó, táe diábí sinaḷáanku in parenta-Mu. 158 Moyaatbí in ginaku in mokoontong kon momomaḻidawan mita tatua, sin mosia tua in diábí dinumudui kon totundú-Mu. 159 Indoiaika dá totokbí in akuoi moibog kon parenta-Mu, o Tuhan, posaḷamatpa kaasí in akuoi podoyon kon tabi-Mu. 160 Bayongan in tosingogon-Mu in totuubí, bayongan in hukum-Mu inta moadil tatua in umuranbí mononoi. Mosundud kon hukum i Tuhan 161 Intau mita inta kokawasa nondudur kon inakó takin diábí in kinodoyonannea, táe tongábí hukum-Mu in koondokku. 162 Dandi-Mu in nokosanang kon ginaku, naonda bo intau inta nokouḻí kon kapunyaan. 163 Bayongan in uboḷ kinodoíku, táe hukum-Mu in kinoibogku. 164 Akuoi in tantúbí mopoyaput in sukur kon ini-Mu, sin hukum-Mu inta moadil. 165 Intau inta moibog in hukum-Mu in moaman bo moodom, diábí in mokoḷamboi kon i monia. 166 Akuoi in mogoḷat mako kon kasaḷamatan nongkon ini-Mu, Tuhan, parenta-Mu mita in inaidanku. 167 Akuoi in notoindudui kon atorang-Mu mita, bo noibog kon inia takin ḻimbatú in gina. 168 Akuoi in dinumudui kon parenta bo topotundú-Mu, sin inontong-Mu in bayongan in aidku. Sambayang mokituḷung 169 Igumon mako kuaniku modapot kon ini-Mu, o Tuhan, ogoiaidon in akuoi in pomomangaḻe, podudui in dandi-Mu. 170 Biódon mako in oigumku modapot kon ini-Mu, posaḷamatpa in akuoi podudui in dandi-Mu. 171 Akuoi in moibog umuran modayow kon ini-Mu, sin Iko in notundú kon atorang-mu. 172 Akuoi in moibog mopodondong soaḷ dandi-Mu, sin bayongan in parenta-Mu in moadil. 173 Igumon mako Iko in umuran moibog motuḷung kon inakó, sin sinantúkudon kon dumudui kon atorang-Mu. 174 Ginaku in mokotanob kon kasaḷamatan nongkon ini-Mu, hukum-Mu in mokosanang kon ginaku. 175 Biódon mako akuoi in mobiag, sinbá akuoi in modayow kon ini-Mu, igumon mako atorang-Mu mita motuḷung kon inakó. 176 Akuoi in noiḷangkam naonda bo domba inta nobuḻi, tuamai in angoidon, bo tayakdon in mogogundoi-Mu naa, sin diábí sinaḷáanku in parenta-Mu mita. |
Alkitab Singog In Mongondow Masa In Tanaa © Indonesian Bible Society, 2016.
Indonesian Bible Society