MAZMUR 118 - Alkitab Singog In Mongondow Masa In Tanaa

Sambayang sukur kon kinountungan

¹ Posukurdon kon i Tuhan sin Sia in mopia, tabi-Nea in mononoi.

² Biódon mako intau in Israel in moguman, “Tabi-Nea in umuran mononoi.”

³ Biódon mako imang mita in moguman, “Tabi-Nea in umuran mononoi.”

⁴ Biódon mako bayongan in intau inta mopirisaya in moguman, “Tabi-Nea in umuran mononoi.”

⁵ Kon bonu in rorigaku akuoi in nokuani kon i Tuhan; bo sinubagan-Nea poḷat pinoḷuat-Nea in akuoi.

⁶ Akuoi in diábí moondok sin ki Tuhan in kotaki-takinku, intau in diábí mokopongonu kon inakó.

⁷ Ki Tuhan in kotaki-takinku sin motuḷung kon inakó, akuoi in mokoontongbí kon musungku taḷowon.

⁸ Mopia-piabí kon mosingayow kon i Tuhan, dika in mopongata kon intau.

⁹ Mopia-piabí in mosingayow kon i Tuhan, dika in mongamang mako kon dodatuon.

¹⁰ Mobayong in musung in noḻibut kon inakó; pinodoyon kon kawasa i Tuhan, sinaḷowku in mosia.

¹¹ Mosia in nongopung kon inakó nongkon bayongan in tampat; pinodoyon kon kawasa i Tuhan, sinaḷowku in mosia.

¹² Naonda bo pasukan mosia in noḻibut kon inakó; pinodoyon kon kawasa i Tuhan, sinaḷowku in mosia, Tongá tokokiap monag piniyongan in mosia naonda bo tuḷú inta nomokak kon bo bonganga.

¹³ Akuoi in totokbí in sinubu bo gogió moḷabú, táe ki Tuhan in notuḷung kon inakó.

¹⁴ Ki Tuhan in pangkoi in ropotku bo kinoibo-ibogku, Sia in noposaḷamatdon kon inakó.

¹⁵ Indongogaidon in giow kinountungan kon ḷoḷaigan mita in umat-Nea, “Ki Tuhan in nopoontongdon in kotorindog-Nea!

¹⁶ Kawasa-Nea in nopountung kon inaton! Ki Tuhan in nopoontongdon in kotorindog-Nea.”

¹⁷ Akuoi in diábí matoi, táe umuranbí mobiag sin mopotaa-taau mako kon aid i Tuhan.

¹⁸ Ki Tuhan in totokdon in nopororiga kon inakó, táe diábí in akuoi inogoi-Nea kon popatoi.

¹⁹ Pobukataidon in akuoi kon ḷoḻingkop in ngara in Baḷoi Tuhan, sinbá tumuot in akuoi bo mopoyaput in sukur kon i-Nia.

²⁰ Naa in ḷoḻingkop in ngara i Tuhan, tongábí intau motuḻid in motaau mongintua.

²¹ Akuoi in modayow kon ini-Mu, sin Iko in notubagdon kon sambayangku; pinountung-Mudon in akuoi.

²² Batu inta iḷumbú in mogogaid mita kon baḷoi, ain nobaḻí batu tongguḷunea.

²³ Tuata in aid i Tuhan, totuu mokoherang kon inaton.

²⁴ Naa in singgai inta sinantú i Tuhan; igai rameon naton takin ḷunganga in gina.

²⁵ Poigumon nami, Tuhan, posaḷamatpa in kami, o Tuhan, pountungdon in kami!

²⁶ Binarakatandon in sia inta namangoi pinodoyon kon tangoi Tuhan, barakatan nami in moiko nongkon Baḷoi Tuhan.

²⁷ Ki Tuhan in ki Allah, Sia in mopia in gina kon inaton. Bayádon in muna moyotakin kokada-kadai in tanga, bo ḻibudon in mezbah i Tuhan.

²⁸ Iko in ki Allahku, akuoi in mopoyaput in sukur kon ini-Mu. Allahku, akuoi in mopoḷantud kon ini-Mu.

²⁹ Posukurdon kon i Tuhan sin Sia in mopia, tabi-Nea in umuran mononoi.