MAZMUR 116 - Alkitab Singog In Mongondow Masa In Tanaa

Noisimparut kon anib in popatoi

¹ Akuoi in moibog kon i Tuhan, sin inindongogan-Nea in akuoi bo nonaridimai kon oigumku.

² Inindongogan-Nea in akuoi, pomuḷoi in akuoi mokuani kon i-Nia.

³ Akuoi in inindoyó in anib in popatoi; popatoi inta mokoondok ain nodomok kon inakó, dá akuoi in inangoian in ḻia-ḻiaw in gina bo moondok.

⁴ Dá nokuani in akuoi kon i Tuhan, “O Tuhan, poigumonku, posaḷamatpa in akuoi!”

⁵ Ki Tuhan tua in kototabi bo moadil; ki Allah naton nopuḻing in tabi.

⁶ Ki Tuhan in noḷukad kon intau mita inta moompá in gina; kon tungkuḷ in akuoi diádon mokopongonu pinosaḷamat-Nea in akuoi.

⁷ Pinoodomku in ginaku, sin ki Tuhan in mopia kon inakó.

⁸ Ki Tuhan in nopoḷuatdon kon inakó nongkon popatoi; iḻipoi-Nea in akuoi bo diá pinomayá-Nea mako in noḷabú.

⁹ Dá akuoi in nobiagdon kon dunia naa, kon bonu in kawasa i Tuhan.

¹⁰ Akuoi in umuranbí mopirisaya, umpaka in akuoi moguman, “Akuoi in totokdon in ná doroton.”

¹¹ Kon bonu in kinotoboḻinguanku akuoi in noguman, “Diábí tobatúmai intau in motaau pirisayaan.”

¹² Onu in ogoiku kon i Tuhan sin potuḻí kon kopopia-Nea kon inakó?

¹³ Akuoi in modiabí kon sosumba anggur kon i Tuhan sin mopoyaput in sukur popisí in totuḷung-Nea.

¹⁴ Akuoi in mogintompodbí kon dandiku kon i-Nia kon tayowon in bayongan in umat-Nea.

¹⁵ Ki Tuhan in totok in motabi kon kopatoian in intau inta kinotabi-Nea.

¹⁶ Akuoi naa in mogogundoi-Mu, o Tuhan, naonda bo ki ináku, akuoi in mogundoi doman kon ini-Mu Iko in nopoḷuatdon kon inakó nongkon ponjara.

¹⁷ Akuoi in modiadon kon kuruban sukur kon ini-Mu, sindaḷan mopoyaput in sambayang kon ini-Mu.

¹⁸ Akuoi in mogintompodbí kon dandiku kon i Tuhan, kon tayowon in bayongan in umat-Nea

¹⁹ inta noyosipun kon palas in Baḷoi Tuhan, kon yua-yuak in kotá in Yerusalem. Dayowdon in ki Tuhan!