MAZMUR 115 - Alkitab Singog In Mongondow Masa In Tanaa

Dodayow kon i Allah Inta Totok in Mokawasa

¹ Deemanbí kami, o Tuhan, deemanbí kami, táe tongábí Iko in musti dayowon, sin Iko in mosatia bo umuran motabi.

² Nongonu sin bangusa mita in mustibí moguman, “Kon onda in ki Allah monia?”

³ Ki Allah naton in kon soroga, Sia in mogaid kon onu in kinoibog-Nea.

⁴ Berhala monia in pinomia nongkon buḷawan bo saḷaka, ḻima in intau in nomia.

⁵ Mosia in kobibig, táe diábí mokosingog, komata táe diá mokoontong.

⁶ Mosia in kobongoḷan, táe diá mokodongog kongiung, táe diá mokobó.

⁷ Mosia in koḻima, táe diá mokokokap, kosioḷ, táe diá mokobayá, bo diábí in singog in ḷumuai nongkon sigoḷoknea.

⁸ Igumon mako natua in ukur in intau mita inta nomia kon tua, bo bayongan in intau inta mopirisaya kon inia.

⁹ Ei intau in Israel, pongamangdon kon i Tuhan, Siabí in motuḷung bo mogoḻingoi kon i monimu.

¹⁰ Ei imang mita, pongamangdon kon i Tuhan, Siabí in motuḷung bo mogoḻiung kon inimu

¹¹ Ei bayongan in intau inta motoguondok, pongamangdon kon i Tuhan, Siabí in motuḷung bo mogoḻiung kon i monimu.

¹² Ki Tuhan in mokotoropbí kon i naton bo momarakat kon i naton, Sia in momarakatbí kon umat in Israel bo bayongan in imang buí i Harun.

¹³ Sia in momarakatbí kon intau mita inta motoguondok, pinomayá mointok andeka moḷoben.

¹⁴ Igumon mako ki Tuhan in mobogoi in adí mobayong, kon i monimu bo kon buímu.

¹⁵ Igumon mako moiko in barakatan i Tuhan, inta nomaḻí kon ḷangit bo butá!

¹⁶ Ḷangit in tongábí ki Tuhan in kitogi, táe butá in inogoi-Nea kon intau.

¹⁷ Ki Tuhan in diábí dinayow in intau minatoi, in intau inta ain noponag kon tampat inta noingongow.

¹⁸ Táe kita inta nobiag in mopoyaput in sukur kon i-Nia, tanaaya modapot in kopaḷutannea. Dayowdon in ki Tuhan!