MAZMUR 114 - Alkitab Singog In Mongondow Masa In Tanaa

Dondong Paska

¹ Kon tungkuḷ in Israel iḻumuai nongkon Mesir, kon dodai in buí i Yakub nonaḷámai kon butá in intau,

² binaḻí i Tuhan in Yohuda tampat-Nea inta motusi, Israel in binaḻí-Nea butá kinawasa-Nea.

³ Dagat in Gelagah nokoontong kon i-Nia bo noḷagui, Ongkag in Yordan nogogai in noiḻig.

⁴ Buḷud mita in mosimbanan naonda bo bembé, tombuḷud mita in morotayok naonda bo ki adí in domba.

⁵ Nongonu degá, ei dagat, nodapot in iko in noḷaguibí, bo Ongkag in Yordan nogogai noiḻig?

⁶ Nongonu sin mosimbananbí in moiko ei buḷud mita, bo morotayok in moiko ei tombuḷud mita?

⁷ Ei butá, kourotdon in kon tayowon i Tuhan, kon tayowon i Allah Yakub,

⁸ inta nomaḷui kon batu karang nobaḻí tabang, bo buḷud batu nobaḻí bokaká in tubig.