MAZMUR 113 - Alkitab Singog In Mongondow Masa In Tanaa

Dodayow kon kopopia in Tuhan

¹ Dayowdon in ki Tuhan! Ei mogogundoi mita i Tuhan, dayowdon in tangoi i Tuhan!

² Tangoi-Nea in pinowaya-waya mako, tanaaya bo kinoouput in dunia.

³ Nongkon pomukaan modapot in toyopan tangoi i Tuhan in mustibí dayowon.

⁴ Ki Tuhan in nongawasa kon bayongan in bangusa, koḷoḷantud-Nea noiḻimonik kon ḷangit.

⁵ Ki ine in ná ki Tuhan Allah naton? Sia in nomarenta kon tampat moḷantud.

⁶ Táe Sia in kinumuyungbí sin moindoi kon ḷangit bo butá.

⁷ Intau nobogá sinintak-Nea nongkon ḷobud, bo intau malarat in binuat-Nea nongkon ḷobud.

⁸ Mosia in pinoḻitú-Nea noyotakin in mongongawasa mita, noyotakin in intau mita moḷoben nongkon umat-Nea.

⁹ Sia in noponotabi in adí mita kon buḷoi bobay inta bantó nomaḻí kon inia iná inta noḷunganga in gina bo ihoromat kon baḷoinea. Dayowdon in ki Tuhan!