MAZMUR 112 - Alkitab Singog In Mongondow Masa In Tanaa

Inta mokoḷunganga kon intau mopia

¹ Dayowdon in ki Tuhan! Pia in kamang in intau inta motoguondok, inta moibog in parenta mita i Tuhan.

² Ki adí-Nea mita in mongawasabí kon butá tanaa, buí in intau mopia in barakatanbí.

³ Motoḷuadínea in mooyúonbí bo mobiag motomoman, bo sia in mobiagbí motompia modapot in mononoi.

⁴ Bayag in monindar kon bonu in sindip kon intau mita inta mojujur, kon intau inta moadil, inta motabi bo mopia in gina.

⁵ Pia in kamang in intau inta mopia in gina bo inta moibog mopoḷuan bo mojujur kon bayongan in yagi-yagi.

⁶ Intau mopia in umuranbí mokouḻí; sia in umuranbí toropon modapot in mononoi.

⁷ Sia in diábí moondok in motarima kon habar diá mopia, ginanea in morotonbí popisí in mopirisaya kon i Tuhan.

⁸ Sia in diábí moḻia-ḻiaw in gina andeka moondok, sin noyakin kon musungnea in taḷowonbí.

⁹ Sia in mosila-silaibí mako kon kapunyaannea, bo mobogoi in oogoi kon intau nobogá; sia in umuranbí mogaid kon inta mopia, tuamai in sia nongawasa bo ihoromat.

¹⁰ Intau moraat nokoontong kon tua bo sinumorú; mosia in noporokokot in bagang popisí in nondoí. Bo noyopú in mosia; kamang monia in noinggamá nodapot in mononoi.