MAZMUR 111 - Alkitab Singog In Mongondow Masa In Tanaa

Dodayow kon i Tuhan

¹ Dayowdon in ki Tuhan! Takin ḻimbatú in gina akuoi mopoyaput in sukur kon i Tuhan kon yuak in pinoyosipunan in umat-Nea.

² Totuu kon mokoherang in aid mita i Tuhan, totokbí in mopia tonduduton in intau mita inta moibog intua.

³ Aid i Tuhan totuu moḷantud bo dinayo-dayow, kooadil-Nea in mononoi totok.

⁴ Ki Tuhan tua in motabi bo mopia in gina, Sia in nogaid kon inta mokotongaw mita, sinbá umuran kotoropan naton intua.

⁵ Sia in nobogoi in rijiki kon intau inta motoguondok, bo inta umuran mokotorop kon dodandian-Nea.

⁶ Sia in nopoontongdon in kawasa-Nea kon umat-Nea, pinongin nobogoi kon i monia in butá budel in bangusa mita.

⁷ Ki Tuhan in moadil bo mosatia kon bayongan inta pomiaan-Nea, bayongan in parenta-Nea motaaubí pongata.

⁸ Hukum-Nea in mononoibí modapot in kopaḷutan in dunia, inogoi-Nea pinodoyon kon inta kobobanar bo kooadil.

⁹ Sia in nopoḷuat kon umat-Nea, bo nomia kon dodandian mononoi takin i monia. Sia tua in ki Tuhan inta mokudus bo motorindog!

¹⁰ Ki ine in moibog mobijaksana musti mohoromat kon i Tuhan, Sia in nobogoi in pomomangaḻe kon bayongan in intau inta motoḷutui. Dinayo-dayowdon in ki Tuhan dapot in mononoi!