MAZMUR 110 - Alkitab Singog In Mongondow Masa In TanaaKi Tuhan bo datu inta piniḻí-Nea 1 Mazmur i Daud. Ki Tuhan in noguman kon i tuangku, “Ḻitúdon kon dotá in koḷanan-Ku, modapot in musungmu mita potungkudon-Ku kon inimu.” 2 Nongkon Sion ki Tuhan in mopooḷadbí in dodatuanmu; kawasaaidon in musungmu mita! 3 Kon singgai iko mamangoi takin kawasa, kon buḷud inta motusi, rayatmu in mayá takin ibog tontaní. Naonda bo oḷú doḷo-doḷom, tayowmobiag mita mamangoi kon inimu. 4 Takin ibot ki Tuhan ain nodandi, diábí gamáan-Nea bui, “Ikobí in imang modapot in mononoi, naonda bo ki Melkisedek.” 5 Ki Tuhan in kon dotá in koḷananmu, aka Sia bo tumorú yo datu mita in taḷowon-Neabí. 6 Sia in mohukumbí kon bangusa mita, dá mayat mita in positabudon. Sia in moyopúbí kon bayongan in mongongawasa kon sinangkub in butá. 7 Datu in monginumbí nongkon ongkag kon bingkí in daḷan, naonda in iniropotan mako, sia in mountungbí. |
Alkitab Singog In Mongondow Masa In Tanaa © Indonesian Bible Society, 2016.
Indonesian Bible Society