MAZMUR 11 - Alkitab Singog In Mongondow Masa In TanaaKi Tuhan in pononiungan 1 Kon i itoi in mododondong. Mazmur i Daud. Akuoi in noniung kon i Tuhan; diábí in mangaḻenea in moguman kon inakó, “Posaḷamatdon in awakmu naonda bo ḷagapan inta iḷumayug kon buḷud. 2 Sin intau moraat momadangdon kon puḷu in piotnea bo mopotaandon mako in piotnea sin mopopiot kon tampat inta mosindip kon intau inta motuḻid. 3 Aka dodoyonan in kobobiag in intau posibayá, yo intau mopia in kodaitandon in akaḷ.” 4 Ki Tuhan in oyúon kon Baḷoi-Nea inta motusi, tampat pomomarentaan-Nea in kon soroga. Sia in umuran monaridi kon umat intau bo nonotaau kon bayongan in oaid monia. 5 Ki Tuhan in nonungkuḷ kon intau mopia bo intau moraat, dinoí-Nea in intau inta moḻingá. 6 Intau moraat ihukum-Nea in bodito, takin tuḷú, balerang bo tompot inta mokopokak. 7 Sin ki Tuhan in mopia bo moadil, Sia in motabi kon intau inta nogaid kon inta mopia; intau motuḻid in mokoontongbí bo monotaau kon i Tuhan. |
Alkitab Singog In Mongondow Masa In Tanaa © Indonesian Bible Society, 2016.
Indonesian Bible Society