MAZMUR 108 - Alkitab Singog In Mongondow Masa In TanaaSambayang mokituḷung in tumayow kon musung ( Mzm. 57:7-11 , 60:5-12 ) 1 Dondong. Mazmur i Daud. 2 Moropotbí totok in pirisayaku, o Allah, moibogdon totok in akuoi in modondong bo modayow kon ini-Mu. Ei, pobangondon, dimukudku! 3 Ei pobangondon, gambus bo kecapi! Akuoi in moibog motomu kon singgai modiug mobayag. 4 Tuhan, akuoi in moibog mopoyaput in sukur kon ini-Mu kon sigad in bangusa mita. Akuoi in moibog mopodondong in dodayow kon ini-Mu kon sigad in umat intau. 5 Sin tabi-Mu in moḷoben modapot kon ḷangit bo kososatia-Mu in modapot kon goḷom mita. 6 O Allah, poontongdon in koḷoḷantud-Mu kon ḷangit, bo kamuliaan-Mu kon sinangkub in butá. 7 Posaḷamatdon in kami takin kawasa-Mu, tubagaipa kaasí in sambayang nami, sinbá intau mita inta kinotabi-Mu posaḷamaton. 8 Nongkon tampat-Nea inta motusi ki Allah in noguman, “Akuoi in monggiow bo mosila-silai kon butá in Sikhem, Ḷopá in Sukot in undion-Ku. 9 Gilead bo Manasye in kapunyaan-Ku, Epraim in sapoyo uwaja-Ku, bo Yohuda in tungkud in dodatuan-Ku. 10 Táe Moab in pomomataan-Ku kon sioḷ; Akuoi in monggiow kon kinountungan nongkon Pilistea. Kon i Edom pinogambatan-Ku in aip in sioḷ-Ku, saḷaku tomponuot kon sia in kapunyaan-Ku.” 11 Ki ine in modia kon inakó mayá in Edom? Ki ine in mokapit kon inakó mayá in kotá inta dininding tatua? 12 O Allah, diá degá in Iko mayá moyotakin nami? Diá degá in Iko mayá moyotakin in tontara nami? 13 Tuḷungaidon in kami in monayow kon musung, sin totuḷung in intau diábí in mangaḻenea. 14 Moyotakin i Allah, kita in motorindogbí totok; Siabí inta monaḷow kon musung naton. |
Alkitab Singog In Mongondow Masa In Tanaa © Indonesian Bible Society, 2016.
Indonesian Bible Society