MAZMUR 107 - Alkitab Singog In Mongondow Masa In Tanaa

BUK NOGINḺIMA: MAZMUR 107–150 Dondong sukur in intau mita inta sinobut i Tuhan

¹ “Posukurdon kon i Tuhan sin Sia in mopia, tabi-Nea in mononoi totok.”

² Bui-buimaidon singog intua, ei moiko inta ain pinosaḷamat nongkon susa.

³ Moiko in sinipun-Neadon nongkon butá mita in intau ibanea, nongkon pomukaan bo toyopan, utuan bo toḷatan.

⁴ Oyúon in nodondaḷoi kon kayuon, bo diá nonotaau in daḷan mayá pinogutunan kon kotá.

⁵ Mosia in inaput in gogoy bo yogang bo kinobuḻian in bayongan in kamang.

⁶ Kon bonu in susa mosia in nokuani kon i Tuhan, bo pinoḷuat-Nea in mosia kon roriga.

⁷ Sia in nodia kon i monia nongin daḷan inta notuḻid minayá in pinogutunan kon kotá.

⁸ Patusbí in mosia mosukur kon i Tuhan popisí in tabi-Nea, popisí in mia-Nea mita inta mokotongaw kon intau.

⁹ Sin Sia in mopoorop kon intau inta noyogang, bo mobogoi in mobayong inta mopia kon intau ginogoi.

¹⁰ Oyúon in iḻimitú kon bonu in sindip, intau pinonjara inta nororiga kon bonu in umantungan uatoi,

¹¹ sin mosia in nomarontakdon kon i Allah bo diá nopandungmai kon parenta i Inta Totok in moḷantud.

¹² Sia in nomutuk kon gina monia pinongin oaidan mobogat; mosia in noḷabú bo diá in notuḷung.

¹³ Kon bonu in susa mosia nokuani kon i Tuhan, bo pinoḷuat-Nea in mosia kon roriga.

¹⁴ Dinia-Nea in mosia iḻumuai nongkon sindip, bo nomutoḷ kon pinoumantungan kon i monia.

¹⁵ Patusbí in mosia mopoyaput in sukur kon i Tuhan popisí in tabi-Nea, popisí in mia-Nea mita inta mokotongaw kon intau.

¹⁶ Sin Sia in nogumpag kon ngara mita bitú, bo nomutuk kon bilabag mita uatoi.

¹⁷ Oyúon in dondunguḷ bo nororiga popisí in dosa mita monia, bo iroriga popisí in taḷá monia.

¹⁸ Mosia in doídon kon bayongan in kokaanon, singgai kopatoian monia in nodiugdon.

¹⁹ Kon bonu in susa, mosia in nokuani kon i Tuhan, bo pinoḷuat-Nea in mosia nongkon roriga.

²⁰ Sia in nongundam kon i monia pinodoyon kon parenta-Nea, bo nopoḷagui kon i monia nongkon bubú in poḷoḷobongan.

²¹ Patusbí in mosia mopoyaput in sukur kon i Tuhan popisí in tabi-Nea, popisí in mia-Nea mita inta mokotongaw kon intau.

²² Biódon mako in mosia mopoyaput in sukur poḷat modia kon sosumba, bo mopotaa-taau mako in aid-Nea pongin dondong pia in gina.

²³ Oyúon doman inta iḷumoḷan kon dagat takin sinumakoi kon kapaḷ, sin motayak kon kobiagan kon dagat inta mooḷad.

²⁴ Mosia in nokoontong kon aid mita i Tuhan, mia-Nea inta mokoherang kon dagat.

²⁵ Podudui in parenta-Nea nogirupdon in deḷang bo noponomburádon kon bokoḷ mita.

²⁶ Kapaḷ mita noibingkat noḷantud kon toḷungayá, bo pinogambat kon apad in dagat. Intau mita in kinobuḻiandon in barani in tumayow kon anib moḷoben tatua.

²⁷ Noḷoḷangu in mosia bo noḷungkoyódon naonda bo intau noḷoḷangu bo kinobuḻiandon in akaḷ.

²⁸ Kon bonu in susa mosia nokuani kon i Tuhan, bo pinoḷuat-Nea in mosia nongkon roriga.

²⁹ Deḷang inta nondangat pinoki gogaian-Nea, nodapot in bokoḷ mita noḻenedon.

³⁰ Nosanang in gina monia sin deḷang in noitaḻibdon; dinia-Nea in mosia kon totubuan inta niaton monia bayáan.

³¹ Patusbí in mosia mopoyaput in sukur popisí in tabi-Nea, popisí in mia-Nea mita inta nokotongaw kon intau.

³² Mosia in nopoḷantud kon komomulia in Tuhan kon yuak in umat-Nea, bo nodayow kon i-Nia kon bonu in pinoyodungkuḷan in guhanga mita.

³³ Ongkag mita binaḻí-Nea padang gurun bokaká binaḻí-Nea butá noingkag.

³⁴ Butá mopia binaḻí-Nea rawang simuton, popisí in aid moraat in intau mita inta nogutun kon tua.

³⁵ Padang gurun binaḻí-Nea tabang, butá noingkag binaḻí bokaká.

³⁶ Intau mita ginogoi pinoutun-Nea kon tua; mosia in noposindog in kotá sin pogutunan monia.

³⁷ Mosia in nogambor kon gobá mita bo nomuḷa kon pangkoi in anggur, bodongka mosipun kon bungai in boyónea inta mobayong.

³⁸ Ki Tuhan in nobogoi in adí mobayong kon i monia, bo bobiagon monia in umuran momuí.

³⁹ Táe mosia in sinaḷow bo dongkadon topiḻik popisí in roriga bo pinondorotan inta noḻingá.

⁴⁰ Ki Tuhan in nopoompá kon mongongawasa monia, bo nopotabá kon i monia nodondaḷoi kon ḷopá in kayuon inta diá in daḷannea.

⁴¹ Táe inta nobogá in pinoḷuat-Nea nongkon susa monia, motoḷuadí monia in modugang naonda bo paanan in domba.

⁴² Intau motuḻid in mokoontong bo mopia in gina, táe intau moraat in sinukuman.

⁴³ Igumon mako intau mobijaksana in morai kon bayongan intua bo akúon monia kon ki Tuhan in umuranbí motabi.