MAZMUR 106 - Alkitab Singog In Mongondow Masa In Tanaa

Kopopia i Tuhan kon umat-Nea

¹ Posukurdon kon i Tuhan, sin mopia in Sia; tabi-Nea in mononoi.

² Ki ine in motaau mopohaba-habar mako in kototorindog i Tuhan, bo mobogoi in dodayow inta patus kon i-Nia?

³ Pia in kamang in intau inta dinumudui kon parenta-Nea mita, bo umuran mobanar in aidannea.

⁴ Toropdon in akuoi, o Tuhan, podudui in kopopia-Mu kon umat-Mu, tuḷungai domandon in akuoi aka Iko moposaḷamat kon i monia.

⁵ Igumon mako akuoi mokoontong kon kobiagan motompia in intau mita inta piniḻí-Mu bo moḷunganga moyotakin in umat-Mu. Igumon mako akuoi moyunggagá bo mopia in gina moyotakin in intau mita inta nobaḻí umat-Mu.

⁶ Kami in binaradosadon naonda bo mogoguyang nami; kami in nogaidon kon inta moraat bo nonoḻikudon.

⁷ Kon tungkuḷ in kon Mesir mogoguyang nami diá nomangaḻe; mia-Mu inta mokotongaw diábí kinomangaḻean monia. Kinoḻiongan monia in tabi-Mu inta moḷoben totok, bo kon diug in Dagat in Gelagah mosia in nomarontak kon i Inta Totok in Moḷantud.

⁸ Táe ki Tuhan in noposaḷamat kon i monia podoyon kon i-Nia tontaní, sinbá kotorindog-Nea in moniata.

⁹ Podudui kon parenta-Nea Dagat in Gelagah noingkag, Sia in nodia kon umat-Nea minayá nongin dagat, naonda bo minaya-mayá nongin padang gurun.

¹⁰ Tua in inaidan-Nea sin moposaḷamat kon i monia nongkon kawasa in musung, pinoḷuat-Nea in mosia nongkon kawasa in musung.

¹¹ Táe tubig in noḷomot kon musung monia; diá tobatúmai in kinotaḻiban.

¹² Bo umat-Nea in nopirisayadon kon dandi-Nea bo nopodondong in dodayow kon i-Nia.

¹³ Táe ḷagibí kinoḻiongan monia in aid i Tuhan bo mogaid takin diádon mopoigum in tonggina-Nea.

¹⁴ Kon padang gurun mosia inaputan in ibog, bo nosoba kon i Allah.

¹⁵ Sia in nobogoi kon onu in inigum monia, táe yampoi in takit inta nonubu kon i monia.

¹⁶ Kon padang gurun tatua mosia in nointoi kon i Musa bo kon i Harun mogogundoi-Nea inta motusi.

¹⁷ Bo butá nobotak bo noḻiom kon i Datan, nonungkub kon i Abiram takin motoḷuadínea.

¹⁸ Tuḷu in noponag bo nondangat kon i monia, nomokak kon bayongan inta diádon mopirisaya.

¹⁹ Kon Buḷud in Sinai mosia in nomia kon ki adí in sapi nongkon buḷawan, bo nosumba kon patong inta pinomia monia tatua.

²⁰ Mosia in noponoḻiu kon i Allah inta moḷantud takin patong in sapi mokokaan kon bonok.

²¹ Mosia in noḻiong kon i Allah mopoposaḷamat monia inta ain nogaid kon aid mita moḷoben kon Mesir.

²² Totuu motoyang in aid-Nea mita kon butá tatua, mokotongaw onu in inaidan-Nea kon Dagat in Gelagah.

²³ Dá niaton i Allah yopúon in umat-Nea, táe inimaḷowan i Musa, intau inta piniḻí-Nea. Ki Musa in nobaḻí tonsigad kon i monia, dá noonow in torú i Allah.

²⁴ Onda intua mosia nondoí kon butá inta mopia tatua popisí in diá mopirisaya kon dandi i Allah.

²⁵ Mosia in nonggomong-gomot kon bonu in ḷoḷaigan monia bo doí mokidongog kon singog i Tuhan.

²⁶ Dá takin ibot Sia in nodandi kon moḻimod kon i monia kon padang gurun.

²⁷ Buí monia in ḷumbúon-Neabí kon sigad in bangusa mita bo porariton kon butá mita in intau.

²⁸ Onda intua kon Peor nosumba in mosia kon Baal, bo nokaan kon onu inta pinosumba kon dewa mita.

²⁹ Aid tatua in nokopomuká kon torú i Tuhan, dá mosia in inangoi in yampoi inta mokokoningkim.

³⁰ Táe ki Pinehas in sinimindog bo nohukum kon inta kotaḷá, dá nogogaidon in yampoi tatua.

³¹ Aid tatua in inanggap nobaḻí jasanea, bo sinorop dapot in mononoi.

³² Kon parigí mita in Meriba mosia in nokopopisí kon i Tuhan sinumorú, bo nokoposusamai kon i Musa takin aid monia.

³³ Pinosakí monia in gina-Nea, dá diádon in sia norai bo nosingog.

³⁴ Bangusa mita ibanea diábí iyopú monia, ná inta pinarenta i Tuhan.

³⁵ Nodapotbí in mosia inumauk kon bangusa mita tatua, bo dinumayan kon gogutú in intau mita inta diá nonotaau kon i Allah.

³⁶ Bo mosia in nosumba kon berhala mita, bo tua in nobaḻí dodoyonan kinoḷabúan monia.

³⁷ Mosia in nopokuruban kon i adí mita monia kon berhala mita in Kanaan.

³⁸ Mosia in nopobutak in dugú in intau diá kotaḷá, dugú i adí mita monia tontaní, sin pokuruban kon berhala mita; dá butá tatua in kinotor monia.

³⁹ Popisí in aid mita monia tatua dá mosia in nonajisdon, bo diá notoḷutui kon i Allah.

⁴⁰ Bo sinumagab in torú i Allah kon i monia, Doídon in Sia kon kapunyaan-Nea tontaní.

⁴¹ Dá inogoi-Neadon in mosia kon bangusa mita pinomayá-Neadon mako in mosia kinawasa in musung.

⁴² Bo mosia in dinorot in musung mita monia, bo pinotungkud kon ḻimonag in kawasa monia.

⁴³ Nopobui-buimaidon in ki Tuhan nopoḷuat kon i monia, táe moibo-ibogbí in mosia momarontak, dá noyopú in mosia kon bonu in dosa mita monia.

⁴⁴ Táe ki Tuhan in nokidongog kon karak monia, Sia in nonaridi kon susa monia.

⁴⁵ Popisí in mosia dá kinotoropan-Nea in dandi-Nea bo nonotabidon kon i monia popisí in tabi-Nea inta moḷoben.

⁴⁶ Binaḻí-Nea in mosia kinotabi in bayongan in intau inta nodakop kon i monia.

⁴⁷ Posaḷamatpa kaasí in kami, o Tuhan Allah nami, sipunpa in kami nongkon sigad in bangusa mita, sinbá kami motaaudon mopoyaput in sukur bo modayow kon tangoi-Mu inta motusi.

⁴⁸ Dayowdon in ki Tuhan, ki Allah in Israel, tanaa mako dapot in mononoi. Biódon mako bayongan in intau moguman, “Amin!” Dayowdon in ki Tuhan!