MAZMUR 105 - Alkitab Singog In Mongondow Masa In Tanaa

Ki Allah bo umat-Nea

¹ Posukurdon kon i Tuhan, potaa-taaudon mako in koḷoḷoben-Nea, oumandon in aid-Nea kon bangusa mita.

² Podondongdon in dondong dodayow kon i Tuhan, pohabardon in bayongan mia-Nea inta mokoherang.

³ Siabí in ki Tuhan Inta Totok in motusi; pokosanangdon sin kita Sia in kitogi, komintan inta mosumba yo igumon mako mokopoḷunganga.

⁴ Poigumdon kon ropot nongkon i-Nia, umurandon sumba in Sia.

^5-6 Ei buí i Abraham, mogogundoi-Nea, bo buí i Yakub, intau inta piniḻí-Nea, toropdon in bayongan inta mokoherang inta inaidan-Nea, dika mokoḻiong kon inta ain sinantú-Nea mita.

⁷ Ki Tuhan in ki Allah naton, onu inta sinantú-Nea in popoaidbí kon sinangkub in dunia.

⁸ Sia in umuranbí mokotorop kon dodandian-Nea, dandi-Nea in mononoibí.

⁹ Dodandian tatua in pinomia-Nea takin i Abraham, bo noiduduimai takin i Ishak;

¹⁰ bo iniyotonan takin i Yakub, nobaḻí dodandian inta mononoi kon umat in Israel.

¹¹ Guman-Nea, “Butá in Kanaan in ogoi-Kubí kon inimu, mobaḻí butá budelmu.”

¹² Dungkuḷmai umat i Allah in nobiag saḷaku intau ango-angoi kon tua tongábí topiḻik in mosia.

¹³ Mosia in nodondaḷoi nongkon bangusa tobatú minayá in bangusa ibanea, nomamping nongkon butá tobatú minayá in butá ibanea.

¹⁴ Táe ki Tuhan in diábí nopomayá kon i ineka in mondorot kon i monia; popisí in mosia, datu mita inogoian-Nea in tompoingat,

¹⁵ “Dika monuyayow kon intau mita inta piniḻí-Ku, dika mopoaid in moraat kon nabi-Ku mita!”

¹⁶ Ki Tuhan in nopoangoi in gogoy kon butá tatua, bo nogamá kon bayongan in tongkaaḷ in kaanon.

¹⁷ Táe Sia in nopotabá kon intau tobatú inumuna kon i monia, ki Yusup, inta ain pinotaḷui nobaḻí ata.

¹⁸ Sioḷnea in pinobonu kon kayu umantungan, sigogownea in binoboḷan in rante uatoi.

¹⁹ Imbuitnea nobaḻídon onu inta sinoḷanownea, sia in pinopobanar in tosingogon i Tuhan.

²⁰ Bo ki datu in Mesir, mongongawasa in bangusa mita, nopoḷuai kon inia nongkon ponjara.

²¹ Sia in pinopopirisayaan in oaidan moindoi kon komaḻig, bo inogoian in kawasa moindoi kon bayongan in tombonunea;

²² bo pinopopirisayaan doman mogator kon pogawai mita i datu, bo mobaḻí itoi kon inta noguyangdon mita.

²³ Bo ki Yakub in minayá in Mesir bo nogutun notantú kon tua saḷaku intau ango-angoi.

²⁴ Pinomia i Tuhan in umat-Nea nodugang nobayong, dá mosiadon in moropo-ropot nongkon ḷawangnea.

²⁵ Binaḷuian-Nea in gina in intau in Mesir dá noyaatdon in gina monia kon umat-Nea bo sinombogádon monia in mogogundoi-Nea mita.

²⁶ Bo pinotabá-Nea in ki Musa mogogundoi-Nea bo ki Harun intau piniḻí-Nea.

²⁷ Kon Mesir mosia in nogaid kon inta mokoherang mita, aid mita moḷoben nongkon i Tuhan,

²⁸ bo mosia in motoindudui kon parenta-Nea. Bo binaḻí i Tuhan in butá tatua sinimindip komintan.

²⁹ Ongkag monia binaḷuian-Nea nobaḻí dugú, dá nodait minatoi in toyá kon bonunea.

³⁰ Tumpaḷak maya-mayá mako kon butá monia, nodapot in sinumuot kon komaḻig i datu.

³¹ Podudui in parenta i Allah namangoidon in ḷangow mita, bo yongit mita noyosipundon kon sinangkub in butá.

³² Sia in nopoonag in uyan eis, bo nopoangoi in kilat inta monampí magí mako.

³³ Inumpag-Nea in pangkoi in anggur bo pangkoi in ara, bo nogumpag doman kon bayongan in pangkoi in kayu monia.

³⁴ Podudui in parenta-Nea, namangoidon in pangkoḷá, totuu mobarong, diádon koiapan.

³⁵ Mosia in nokaan kon bayongan in pinomuḷa kon gobá, bo nokaan nokopodait kon bayongan in bungai in pinomuḷa kon butá.

³⁶ Bo iḻimod-Nea in adí mita ḷoḷaki inta guya-guyang kon bayongan in motoḷuadí in intau in Mesir.

³⁷ Onda intua bangusa in Israel inatod-Nea iḻumuai, mosia in nodia kon buḷawan bo saḷaka; komintan nosehat bo noropot.

³⁸ Intau in Mesir kinoaputan in ondok bo koningkim, dá nopia in gina monia kon tungkuḷ in intau in Israel minayá.

³⁹ Ki Allah in nopobandang in goḷom sin mogoḻiung kon umat-Nea, bo tuḷú sin ponimbayag kon i monia kon tungkuḷ in doḷom.

⁴⁰ Mosia in nopoigum, bo pinopoangoi-Neadon in ḷagapan onggo-onggoyung, mosia in inogoian-Nea in roti nongkon soroga nodapot in nobotug.

⁴¹ Binotak-Nea in buḷud batu, bo noitampurangdon mangoi in tubig inta noiḻig naonda bo ongkag kon padang gurun.

⁴² Sin ki Tuhan in nokotorop kon dandi-Nea kon i Abraham, mogogundoi-Nea.

⁴³ Dá inatod-Nea in umat-Nea takin pia in gina, intau mita inta piniḻí-Nea takin giow sanang in gina.

⁴⁴ Butá in bangusa mita inogoi-Nea kon i monia, gobá mita monia binaḻí-Nea kapunyaan in umat-Nea,

⁴⁵ sinbá umat-Nea tatua in motoindudui kon hukum-Nea mita bo dumudui kon parenta-Nea mita. Dayowdon in ki Tuhan!