MAZMUR 104 - Alkitab Singog In Mongondow Masa In Tanaa

Dayowdon in ki Inta momomaḻí

¹ Dayowdon in ki Tuhan, ei dimukudku! Totuu moḷantud in Iko, o Tuhan Allahku! Iko in nopogiḷambung in koyunggaga bo kamuliaan,

² bo kinoḷubungan in sindar. Iko in nomukat kon ḷangit naonda bo ḷoḷaigan,

³ bo noposindog in Baḷoi-Mu kon tudu in tubig kon ḷangit. Goḷom mita binaḻí-Mu kereta-Mu, Iko in sinumakoi kon koḻikip in tompot.

⁴ Tompot in binaḻí totabá-Mu, bo kilat in mobobantung-Mu.

⁵ Pinoḻitú-Mu kinorigon in butá kon dodoyonannea, dá diábí modandú modapot in mononoi.

⁶ Kinoḷubungan-Mu in baḷangon intua, tubignea in nonagom kon tudu mita in buḷud.

⁷ Kon dodai in ginuakan-Mu, tubig tatua noiḻig, noiḻig notorú popisí in doḷodok in singog-Mu.

⁸ Tubig in noiḻig nongin buḷud mita noituot kon ḷopá, kon tampat inta sinadia-Mu kon inia.

⁹ Sinantú-Mu in sigadnea mita inta diá motaau bayáannea, sinbá diádon bui monagom kon butá.

¹⁰ Pinoḷuai-Mu in bokaká mita kon ḷopá mita, tapá in moiḻig kon sigad in tombuḷud mita,

¹¹ sin mopoinum kon bayongan in mahaḷuk kon gobá, bo mopoguḻí in rogang kon keledai mita kon kayuon.

¹² Kon diugnea ḷagapan mita momia kon pugadnea; mosia in monontuoḷ kon sigad mita in daun.

¹³ Nongkon ḷangit pinoonag-Mu in uyan kon buḷud, butá nopuḻing in aid in ḻima-Mu.

¹⁴ Iko in nomiag kon bonok kokaanon in bobiagon, bo kon intau in noyagi-yagimai in pinomuḷa. Dá motaaudon in sia monompinomuḷa,

¹⁵ bo mobogoi in anggur inta mokopia kon gina. Ḷana in zaitun doman inta mokotarimbuka mako kon pogotnea, bo kaanon inta mokoropot kon inia.

¹⁶ Pangkoi mita in kayu i Tuhan in nokouḻí kon uyan mobayong pangkoi in ḷokuyú in Libanon inta pinomuḷa-Nea tontaní.

¹⁷ Kon tua monompugadon in ḷagapan mita, ḷagapan ranggung nonompugad kon ḷuntungnea totok.

¹⁸ Buḷud mita moḷantud nobaḻí tampat in bembé in kayuon; rusa in mogadop kon batu karang.

¹⁹ Binaḻí-Mu in buḷan nobaḻí tomponuot kon wakutu, mata in singgai kotaauannea in wakutunea tumoyop.

²⁰ Aka poangoi-Mu in sindip, singgai in modoḷomdon, bo bayongan in mahaḷuk kon kayuon in maya-mayá mako.

²¹ Singa mita batánea moganggor motayak kon kaanonnea, moigum kon kaanon inta sinadia i Allah.

²² Aka momukádon in mata in singgai, moḷagui in mosia bo umuḻid kon pogogadopannea.

²³ Bo ḷumuaidon in intau sin mogaid kon oaidannea, bo umuran mogaid modapot in ḷoḷabungnea.

²⁴ Totuu mobayong in mia-Mu, Tuhan, komintanbí pinomia-Mu takin mobijaksana; butá in nopuḻing in aid-Mu.

²⁵ Indoiaidon in dagat inta nooḷad noibontang, takin mahaḷuk inta moḷoben mointok diá koiapan.

²⁶ Kon tua in kapaḷ mita ḷumeag, bo Lewiatan, naga in dagat inta binaḻí-Mu, mogogitogmai.

²⁷ Mosia komintan in mogoḷatbí mako kon ini-Mu, sinbá mokouḻí kon kaanon kon wakutunea.

²⁸ Iko in nobogoi, bo mosia in nosipun kon tua, Iko in noposadia kon tua, bo mosia in nongaan nodapot in noorop.

²⁹ Aka iko monoḻikud, moondok in mosia; aka gamáan-Mu in poginaannea, matoi in mosia, bo mobaḻí bui ḷobud naonda bo dungkuḷ.

³⁰ Táe aka mosia ogoian-Mu in poginaan, mosia in binaḻí; Iko in nobogoi in kobiagan mobagu kon butá.

³¹ Igumon mako koḷoḷantud i Tuhan in mononoi! Igumon mako mopia in gina-Nea takin in bayongan inta binaḻí-Nea!

³² Inindoian-Nea in butá bo pinomia-Nea nourot, buḷud mita iḻiai-Nea, dá iḻumuai in poyoknea.

³³ Akuoi in moibog modondong kon i Tuhan kon dodai in akuoi mobiagpa, mopodondong in dodayow kon i Tuhan kon bonu in akuoi oyúonpa.

³⁴ Igumon mako dondongku in mokosanang kon gina-Nea, sin Siabí in nopoḷunganga kon ginaku.

³⁵ Biódon mako in intau binaradosa moinggamá kon dunia naa, biódon mako in intau moraat modait moyopú. Dayowdon in ki Tuhan, ei dimukudku! Dayowdon in ki Tuhan!