MAZMUR 102 - Alkitab Singog In Mongondow Masa In Tanaa

Sambayang kon bonu in susa

¹ Sambayang in intau nororiga inta noḻemédon in mogamui kon i Tuhan.

² O Tuhan, indongogaipa kaasí in sambayangku, biódon mako kuaniku modapot kon ini-Mu.

³ Dika toḻikudan in akuoi aka koumaan in susa in akuoi. Indongogaipa kaasí in akuoi aka mokuani, bo ḷagidon tubagai in akuoi.

⁴ Kobiaganku in moinggamá naonda bo poyok; tuḷanku mita in monombaga naonda bo tuḷú.

⁵ Mokoḷung in akuoi naonda bo bonok noingkag, bo diádon in ibog mongaan.

⁶ Moropot in karakku; awakku in dongkadon tuḷan binakut in kuḻit.

⁷ Akuoi in nádon onda bo ḷagapan undan kon padang gurun, naonda bo ḷagapan monikuḷu kon apug inta noingongow.

⁸ Akuoi in diá mokosiug, naonda bo ḷagapan inta tongá sia-sia mita kon binubungan in baḷoi.

⁹ Kinoouput in singgai musung moningkuḻe kon inakó; tangoiku in binaḻí kutuk i intau mita inta tumorú kon inakó.

¹⁰ Akuoi in mokaan kon ḷobud naonda bo roti, oinumonku noyobauk in ḷuá,

¹¹ sin Iko in nobuatdon bo nopogambat kon inakó kon bonu in torú-Mu inta sinumaga-tagab.

¹² Kobiaganku in moitaḻib naonda bo oḻinow ḷoḷabungnea; akuoi in noḷaḷow naonda bo bonok.

¹³ Táe Iko, o Tuhan, Datu inta mononoi, táe umuran sinorop dapot in adí bo ompu monag.

¹⁴ Iko in simindogbí bo monotabi kon Sion, nodapotdon in wakutunea monotabi kon inia.

¹⁵ Sin mogogundoi-Mu in moibog kon inia, umpaka nobaḻídon apug in sia. Mosia angoian in tabi kon inia, umpaka nobaḻídon in sia ḷobud.

¹⁶ Kawasa i Tuhan in koondokbí in bangusa mita; bo koḷoḷantud-Nea kobangkaḷ in bayongan in datu,

¹⁷ aka ki Tuhan moposindog bui in Sion, bo simindog kon bonu in koḷoḷantud-Nea.

¹⁸ Sia in mokidongogbí kon sambayang in umat-Nea kon bonu in roriga, bo diábí mondoí kon oigum monia.

¹⁹ Paisdon in bayongan inta inaidan i Tuhan kon intau mita inta moiduduimai, sinbá bangusa inta diápa pinononggadí motaaudon modayow kon i-Nia.

²⁰ Ki Tuhan in nobobui nongkon tampat-Nea inta moḷantud, nongkon soroga iḷumongow in Sia kon butá

²¹ sin mokidongog kon amui in intau inta kon bonu in ponjara bo mopoḷuat kon intau inta hukumon matoi.

²² Dá tangoi-Nea in popotaa-taau mako kon Sion, bo Sia in dayo-dayowonbí kon Yerusalem,

²³ kon dodai in bangusa mita bo dodatuan mita noyosipun sin mosumba kon i Tuhan.

²⁴ Ki Tuhan in nomutoḷ kon ropotku kon tungkuḷ in akuoi noguodpa, bo nogimpoḷok kon umurku.

²⁵ Bo akuoi in noguman, “O Allah dikapa gamáan in nyawaku kon kinotombotakan in kobiaganku.” Tuhan, Iko in mobiag mononoi,

²⁶ dungkuḷmai Iko in nomaḻí kon butá; ḷangit in Iko doman kitogi mia.

²⁷ Tua komintan in moinggamábí, táe Iko in umuranbí oyúon; tua mita in mokoyonganbí naonda bo pakeang. Ḷumbúon-Mu intua naonda bo ḷambung nokoyongan, bo komintandon moputú.

²⁸ Táe Iko in diábí mobaḷu-baḷui, kobiagan-Mu in diábí in imbuitnea.

²⁹ Adí bo ompu nami in mobiagbí motompia, bo umuran moodom kon bonu in ḷukadan-Mu.