MAZMUR 101 - Alkitab Singog In Mongondow Masa In Tanaa

Dandi in datu tobatú

¹ Mazmur i Daud. Akuoi in moibog mopodondong in kososatia bo kooadil, kon ini-Mu, o Tuhan, dondong dodayowku!

² Akuoi in monaridi kon kobobiag inta diá in bogit. Moibog degá in Iko mamangoi kon inakó? Akuoi in moibog mobiag motusi kon baḷoiku,

³ aid moraat in diábí pomayáku mako. Kodoí-Kubí in dodia in intau inta nomaḻidawan, bo doíbí in akuoi mopandungmai kon i monia.

⁴ Akuoi in doíbí monombogá bo doíbí mogaid kon inta moraat.

⁵ Intau inta umuni-uni moponapud in uboḷ in putúanbí. Intau inta moḷoḷatú bo motosiḷantud in diábí pomayáku mako.

⁶ Koibogku in intau inta motoḷutui kon i Allah; mosia in motaaubí in mogutun kon baḷoiku. Intau inta mobiag diá in bogit in motaau mobantung kon inakó.

⁷ Intau mopopak diábí motaau in mogutun kon baḷoiku; inta mouboḷ in diábí monahang in kon tayowonku.

⁸ Pomuḷoi in singgai yopúonku in intau mita moraat kon butá tanaa. Komintan intau inta mogaid kon moraat in inggamáankubí kon kotá i Tuhan.