MAZMUR 10 - Alkitab Singog In Mongondow Masa In Tanaa

Sambayang mopoigum in koadilan

¹ Nongonu sin iko in noyayúbí, o Tuhan bo mogadop kon tungkuḷ in kami mororiga?

² Dumodia in intau moraat mondorot kon intau nobogá; pomayádon mako in mosia moibaaḷ kon poyogaḷap monia tontaní.

³ Intau moraat mongambungangaḷ kon onu in koibognea inta moraat, intau motamaa mongutuk bo mondoí kon i Tuhan.

⁴ Intau binaradosa in diábí mopandungmai kon i Tuhan, popisí in kaḷakuangnea dá norai in sia kon diábí in Allah.

⁵ Intau moraat mokodapot kon bayongan inta iḷongasinea; sia in diábí nonotaau andeka nomangaḻe kon hukum i Tuhan bo mopoompámai kon bayongan in musungnea.

⁶ Sia in mosingog kon bonu in gina, “Akuoi in diábí taḷowon, bo kinoouput in imbuían naonda bo intau inta diá nobiag moraat.”

⁷ Sia in umuranbí mongutuk, mopogogondok bo monguboḷ, singognea mita in nopuḻingbí in yaat in gina bo inta moraat.

^8-9 Sia in mogadop kon ḻipú mita sin moḻimod kon intau mita inta diá kotaḷá. Naonda bo singa sia in mogoḷat kon siungon in bo bonganga motarap mako kon intau inta moyangkó. Sia in moḷabot kon intau nobogá kon tampat inta moingongow, domokonnea bo pogambatnea mako.

¹⁰ Kumuyung in sia, mosadia modomok; sia mopomobak kon intau.

¹¹ Kainiakamai, “Kinoḻiongandon i Allah bo diá bidon inindoian mako; bo moiduduimai in diábí doman ontongon-Nea in akuoi!”

¹² Sindogdon, Tuhan, hukumdon in intau moraat! Toropdon in intau inta iroriga!

¹³ Nongonu sin intau moraat in umuranbí mopoompámai kon i Allah bo morai kon ki Allah in diábí mohukum kon inia?

¹⁴ Táe inontong-Mubí; Sinaridian-Mu in susa bo roriga, bo umuran mosadia motuḷung. Intau inta moyangkó moposarakan in kobiagan kon ini-Mu, Iko in umuranbí motuḷung kon intau nobogá.

¹⁵ Putoḷaidon in kawasa in intau moraat bo moromú; hukumdon in mosia popisí in aidnea modapot in mosia motobat.

¹⁶ Ki Tuhan in momarenta modapot in mononoi; bangusa mita inta diá nonotaau kon i-Nia in moinggamábí nongkon butá-Nea.

¹⁷ Tuhan, Iko in nokidongog kon sambayang in intau nobogá bo moginropot kon gina monia.

¹⁸ Adí uno-unon bo inta iroriga sinuḷungan-Mu in pelekaranea, sinbá diá in intau mopogogondok kon i monia.