MAZMUR 1 - Alkitab Singog In Mongondow Masa In TanaaBUK IMITÁNEA: MAZMUR 1–41 Daḷan intau mopia bo intau moraat 1 Pia in kamang in intau inta diá dinumudui kon tonggina in intau inta moraat, diá dinumayan kon intau binaradosa bo diá noyobayat in intau inta mopoompámai kon i Allah, 2 táe inta moibog mogaid kon parenta i Tuhan bo inta tantú monano-nanob kon tua singgai doḷom. 3 Intau tatua in mokodapot kon bayongan totayaknea; sia in naonda bo pangkoi in kayu inta kon bingkí in tubig inta momungai kon sempo in pomomungainea bo inta diá moḷaḷo-ḷaḷow in daunnea. 4 Noyoḻiu kon tua in intau moraat: sia in naonda bo baḻeká inta inirup pinorarit in tompot. 5 Intau moraat in hukumonbí i Allah, hakimnea bo potondíon nongkon umat-Nea. 6 Sin intau inta motoindudui in kapiton bo ḷukadan i Tuhan, táe intau moraat in mongindaḷan inta mokobodito. |
Alkitab Singog In Mongondow Masa In Tanaa © Indonesian Bible Society, 2016.
Indonesian Bible Society