MATIUS 9 - Alkitab Singog In Mongondow Masa In Tanaa

Ki Yesus nongundam kon intau ḻempeng

¹ Onda intua ki Yesus sinumakoidon kon uangga bo iḷumeag minayá in ḷoḷan danow. Bo noidapotdon in Sia kon ḻipú-Nea tontaní.

² Bo intau nodia mangoi kon i-Nia in intau tobatú inta ḻempeng bo noitosiug mako kon tosiugannea. Naonda inontong i Yesus in pirisaya monia, Sia in noguman kon intau inta diá mokobayá tatua, “Popirisayadon, adí-Ku! Taḷámu aindon inampungan.”

³ Nokodongogmai kon singog i Yesus natua, mototundú mita kon agama Yahudi nosingog kon bonu in gina, kai monia, “Sia in noningkuḻe kon i Allah!”

⁴ Táe kinotaauandon i Yesus in raian monia tatua, tuamai Sia in noḻibó, “Nongonu sin moiko in moraibí kon soaḷ mita inta moraat kon bonu in ginamu?

⁵ Onda degá i mogampa-gampang, moguman, ‘Taḷámu aindon inampungan’, andeka moguman: ‘Pobangondon bo bayádon’?

⁶ Táe bá kotaauan monimu, kon Adí Intau in inogoian in kawasa mongampung kon taḷá kon dunia naa.” Bo Sia in noguman kon intau inta ḻempeng tatua, “Pobangondon, buatdon in tosiuganmu bo pobuidon kon baḷoimu!”

⁷ Intau tatua bango-bangon bo nobui.

⁸ Intau moantó inta nokoontong kon onu inta nobaḻí tatua noondok bo nodayow kon i Allah inta ain nobogoi in kawasa ná domai tua in koḷoben kon intau.

Ki Matius mononagi kon pajak dinumudui kon i Yesus

⁹ Naonda in ki Yesus minayá nongkon tua, Sia nokoontong kon tobatú intau tangoinea in ki Matius inta iḻimitú mako kon kantor in pajak. Ki Yesus in noguman kon inia, “Duduidon kon i-Nakó.” Dá ki Matius in sinimindog doman bo dinumudui.

¹⁰ Bo naonda in ki Yesus nongaan kon baḷoi i Matius, namangoidon doman in intau mita ibanea inta mononagi kon pajak bo intau mita baradosa bo nongaan noyotakin i Yesus bo murí-Nea mita.

¹¹ Tua mita inontong in intau mita in Parisi, dá mosia in noguman kon murí mita i Yesus, “Nongonu sin gurumu in nongaanbí moyotakin mononagi kon pajak bo intau baradosa?”

¹² Singog monia tua dinongog i Yesus, dá Sia in noguman kon i monia, “Deemanbí intau mosehat in moparaḷu kon dokter, táe intaubí nongotakit.

¹³ Manangka intua, bayádon bo balajarpa bui mangaḻe in Pirman tanaa, ‘Koibog-Ku in totabianbí, deemanbí onu inta ogoi monimu’. Sin Akuoi namangoi deemanbí mogoiní kon intau noitutui, táe intaubí baradosa.”

Soaḷ popopuasa

¹⁴ Onda intua namangoidon murí mita i Yohanes kon i Yesus bo noḻibó, “Nongonu sin kami bo intau mita in Parisi in mopuasabí, táe murí-Mu mita in diábí?”

¹⁵ Ki Yesus noḻibó bui kon i monia, “Motaau degá aka nonikaan ḷoḷaki koyotaki-takinpa monia bo yobayatnea mita morobonoḷdon in dodob? Tantú diábí! Oyúonbí in wakutunea nonikaan tatua gamáan nongkon sigad monia. Bain kon wakutu intuata bo mopuasa in mosia.

¹⁶ Diábí in tobatúmai in intau inta momerak kon ḷambung nobagu sin poduḷampong kon ḷambung inta ain nokoyongan. Sin aka berakonneadon in ḷambung nobagu, yo ḷambung nobagu tatua in mogoguyaat domandon.

¹⁷ Ná doman tua, anggur inta nobagupa in diábí motaau bonuon kon botutunea inta ain nokoyongan. Sin aka bonuon yo botutu tatua in mobokatdon bo anggur tatua in moibutak doman, bo botutu tatua in mogoguyaatdon totok. Tuamai anggur inta mobagu in bonuonbí kon tampatnea inta nobagu doman, sinbá tumpaḷa diá mogoguyaat.”

Ki adí in itoi in baḷoi pososambayangan Bobay inta notakit toḷoganmai in dugú

¹⁸ Koyogotpa in ki Yesus nongonguman natua kon i monia, namangoidon in tobatú itoi in baḷoi pososambayangan, bo nosumba kon i-Nia poḷat noguman, “Ki adíku bobay bagupa minatoi, táe akuoi mopoigum kon i Guru mamangoi bo mokadai kon inia, dá mobiagbí bui in sia.”

¹⁹ Ki Yesus in sinimindog bo takin murí-Nea mita minayá noyotakin in intau tatua.

^20-21 Kon dodai intua oyúon doman tobatú bobay inta aindon mopuḷú bodoyowá notaong koonggotnea notakit toḷoganmai in dugú, sia moḷongasi totok dimiug kon i Yesus nongkon tumi sin mokadai kon ubung in jubah-Nea. Sin nanaa in kon raiannea: “Umpakabí tongá koḻiaianku in jubah-Nea, yo mopiabí in akuoi.” Bo iḻiainea in popod in jubah i Yesus.

²² Dodai intua ki Yesus in nobobui bo noindoi kon inia poḷat noguman, “Koroton in ginamu, adí-Ku! Sin iko in mopirisaya kon i-Nakó.” Bo kon dodaipa doman tua bobay tatua nopia.

²³ Naonda in ki Yesus noiyaput kon baḷoi in itoi in baḷoi pososambayangan tatua bo nokoontong kon intau mita inta nogirup kon bansí bo intau mobarong inta motombá mako,

²⁴ Sia noguman kon i monia, “Bayádon, sin adí tanaa in diábí minatoi, tongábí nosiug in sia.” Táe kinosingan monia in ki Yesus.

²⁵ Naonda intau mita tatua pinoḷuai-Nea komintan, ki Yesus sinumuot bo nokadai kon ḻima in adí tatua, bo adí tatua in nobangondon.

²⁶ Habar kon soaḷ inta nobaḻí tatua noiwayadon kon bayongan in ḻipú kon tua.

Ki Yesus nongundam kon intau bilog taya dua

²⁷ Naonda in ki Yesus nongingguput kon bobayáan-Nea, intau bilog doyowa dumuduianmai kon i-Nia bo sindaḷan momaḷú kai monia, “Adí i Daud, kotabipa in kami naa!”

²⁸ Bo naonda in ki Yesus sinumuot kon baḷoi tobatú namangoi domandon kon i-Nia in intau bilog taya dua tua, dá ki Yesus noḻibó kon i nayadua, “Eta mopirisaya in moiko kon Akuoi mokopia kon i monimu?” “Mopirisaya, Amá!” tubag monia.

²⁹ Bo kinadaian i Yesus in mata monia poḷat nosingog, “Popisí in moiko mopirisaya dá kobaḻídon onu inta kinoibog monimu.”

³⁰ Dá nokoontongdon in mosia. Bo ki Yesus nongoyow totok kon i monia, kon donaai oumanon kon i inekabí in onu inta ain nobaḻí tanaa.

³¹ Táe iḷumuai in mosia bo nopotaa-taau mako kon onu inta inaidan i Yesus tatua kon bayongan in ḻipú kon tua.

Intau bobó inundaman i Yesus

³² Naonda in intau mita bilog tatua iḷumuai, diniadon mangoi kon i Yesus in intau bobó tobatú inta kinotoḷangan in dimukud moraat.

³³ Bo naonda in dimukud moraat tatua inuntun-Nea, dodaipa doman tatua nokosingogdon in intau tatua. Intau moantó inta kon tua nongoherang bo nosingog, “Diápa kon dodai in onda in kami in nokoontong kon ná tanion kon Israel.”

³⁴ Táe intau mita in Parisi in noguman, “Tongguḷubí in dimukud mita moraat in nobogoi in kawasa kon i-Nia moguntun kon dimukud mita moraat.”

Tabi i Yesus kon intau mobayong

³⁵ Natuata in inaidan i Yesus kon wakutu in Sia minaya-mayá mako in bayongan kotá bo ḻipu-ḻipúannea. Sia in nobogoi in totundú kon bonu in baḷoi mita pososambayangan bo nopoyaput in Habar Mopia kon naonda in ki Allah momarenta saḷaku Datu. Sia in nongundam doman kon bayongan takit bo yoyiga.

³⁶ Nokoontongmai kon intau moantó tatua, Sia inangoian totok in tabi kon i monia, sin mosia totokdon in moḷopí bo diádon kodaya, naonda bo domba inta diádon kogombala.

³⁷ Dá Sia in noguman kon murí-Nea mita, “Inta koyuton totuu modamaḷ táe mokokoyut in tongá topiḻik.

³⁸ Manangka intua poigumdon kon i togi gobá sinbá potabá-Neadon mangoi in mokokoyut mita kon onu inta paraḷu koyuton tua.”