MATIUS 7 - Alkitab Singog In Mongondow Masa In Tanaa

Pohohakim kon intau

¹ “Donaai moiko mohakim, sinbá moiko in diá doman hakimon.

² Sin naonda in pohohakimmu kon intau ibanea, tua doman in pohakim kon inimu.

³ Nongonu sin puḻing i utatmu in ontongon monimu, táe kayu kon bonu in matamu in diábí kinotaauanmu?

⁴ Naondabí iko motaau moguman kon i utatmu, ‘Igai bá inggamáanku in puḻingmu,’ bokaka kon matamu oyúon in kayu?

⁵ Ei intau momunapik! Poḷuaipa muna in kayu kon bonu in matamu, sinbá motarang in matamu, bo motaaudon mopoḷuai in puḻing kon mata i utatmu.

⁶ Donaaidon moiko mobogoi in barang inta mokudus kon ungkú. Bo donaai moiko mopogarab in mutiaramu kon boké, sinbá diá tongá rita-ritakannea mako intua bodongka mobuimai moyingki-yingkit kon i monimu.”

Poigum, potayak bo ponangkokó

⁷ “Poigumdon, dá ogoianbí in moiko. Potayakdon, dá mokouḻí bí in moiko. Ponangkokódon, dá pobukatanbí in moiko kon ḷoḻingkop.

⁸ Sin pomuḷoi in intau inta moigum motarima; bo intau inta motayak in mokouḻí; bo intau inta monangkokó, pobukatan kon ḷoḻingkop.

⁹ Oyúon degá in kon sigad monimu in mobogoi in batu kon i adínea, aka ki adínea moigum kon roti?

¹⁰ Andeka mobogoi in uḷag kon i adínea, aka poiguman kon toyá?

¹¹ Dá aka moiko inta moraat bo motaau mobogoi, kon inta mopia kon i adímu mita. Yo bambíkabí ki Amámu kon soroga! Sia in moiḻiubí kon tua, ogoian-Neabí inta mopia totok in ki ine inta moigum kon i-Nia.”

¹² Onu inta koibog monimu popoaid in intau kon i monimu yo popoaid domandon kon i monia intua. Tuadon bonu in bayongan atorang i Musa bo inta pinais kon buk in nabi mita.

Ngara inta mosisí

¹³ “Tuotdon pongin daḷan inta mointok, sin daḷan inta mopobayá in naraka moḷoben bo mobanat, bo mobarong in intau mongin tua.

¹⁴ Táe daḷan inta mopobayá in tampat inta mokobiag in nointok bo tongá topiḻik in intau inta mokodapot kon tua.”

Pangkoi bo bungainea

¹⁵ “Mokopoingatdon kon nabi mita inta diá totuu. Nabi inta mamangoi kon inimu naonda bo intau inta mongopia, táe sabanarnea mosia tua intau bí moromú.

¹⁶ Bagubí nongkon oaid monia tua ain kotaauan mongo ki ine i mosia. Degá oyúon in intau mosipú kon bungai in anggur kon pangkoi in díat, andeka ḷantat kon pangkoi in bo bonganga.

¹⁷ Kotaauanbí aka pangkoinea, bo nopira yo mopira doman in bungainea táe aka pangkoinea diá nopira, yo tantú bungainea in diábí doman mopira.

¹⁸ Sin diábí in aka pangkoinea mopira bo mopomungai in inta moraat, andeka pangkoinea inta diá mopira bo mopomungai inta mopira.

¹⁹ Sin pomuḷoi in pangkoi inta mopomungai in diá mopira yo musti pupuḷon bo tubáan.

²⁰ Nongkon oaidnea kotaauandon monimu in mosia.”

Oaidbí, deemanbí tosingogon

²¹ “Diábí komintan intau inta mogoiní kon i-Nakó, ‘Tuhan, Tuhan,’ in mobaḻí umat-Ku, táe tongábí mosia inta dinumudui kon koibog i Amá-Ku inta kon soroga.

²² Kon Singgai Ponantúan moantó in intau inta mogoiní kon i-Nakó: ‘Tuhan, Tuhan, takin moguman; kami naa inta nopoyaput in habar nongkon ini-Mu? Bo inta nomaké in tangoi-Mu in noguntun kon dimukud mita moraat bo nomaké doman in tangoi-Mu nogaid kon inta mokoherang kon intau?’

²³ Kon dodai intua, Akuoi in moguman taran-tarangan kon i monia, ‘Diábí kinotaauan-Ku in moiko! Bayádon pokoyayú kon i-Nakó, sin moiko komintan in intau inta nogaid kon inta moraat!’ ”

Noposindog in baḷoi kon tudu in batu bo kon tudu in bungaion

²⁴ “Pomuḷoi in intau inta nokidongog kon singog-Ku bo aidannea intua komintan, yo sia tua in ibarat intau inta mopandoi, inta noposindog in baḷoinea kon tudu in batu.

²⁵ Naonda in nonguyan, inuntag in ḷunud bo tompot in baḷoi tatua, táe baḷoi tatua diábí nongonumai sin ain pinoposindog kon tudu in batu.

²⁶ Táe pomuḷoi intau inta nokidongog kon singog-Ku tongá doí dinumudui, yo sia tua in notongkai in intau bodok, inta noposindog in baḷoinea kon tudu in bungaion.

²⁷ Onda in nonguyan, inuntag in ḷunud bo tompot in baḷoi tatua, dá noumpag bo nogoguyaat totok.”

Kawasa i Yesus

²⁸ Bo naonda in ki Yesus nonimpod kon singog-Nea tatua, nongoherang in intau nobarong kon tua in nokodongog kon pototundú-Nea.

²⁹ Sin Sia in motundú takin kawasa, diá ná mototundú kon agama monia.