MATIUS 4 - Alkitab Singog In Mongondow Masa In Tanaa

Ki Yesus sinoba in Ibilis

¹ Noiduduimai kon tua, ki Yesus dinia in Roho i Allah minayá in padang gurun sin pokisoba kon Ibilis.

² Bo naonda in Sia nopaḷut nopuasa opat nopuḷú nosinggai bo opat nopuḷú nogobii, inangoiandon gogoy in Sia.

³ Dá namangoidon Ibilis bo noguman kon i-Nia, kainia: “Aka Iko totu-totuu ki Adí i Allah, yo aidaidon roti in batu mita tanaa”.

⁴ Táe ki Yesus in notubag nanaa, “Oyúon pinais, ‘Intau deemanbí tongá mobiag in roti, táe mobiagbí doman in pirman inta siningog i Allah.’ ”

⁵ Onda intua ki Yesus in dinia Ibilis minayá in Yerusalem inta sinangoi kotá motusi tua bo sinimindog kon binubungan Baḷoi i Tuhan,

⁶ bo Ibilis in noguman kon i-Nia, “Aka Iko in ki Adí i Allah, yo ḷandukka monag, sin ain pinais kon Buk Motusi nanaa: Pokisingkapbí i Allah kon malaekat-Nea mita Iko, sinbá diá moidatong kon batu in sioḷ-Mu.”

⁷ Dá ki Yesus in noguman kon inia: “Oyúon doman in pinais kon Buk Motusi: Donaaidon moiko monungkuḷ kon i Tuhan, ki Allahmu!”

⁸ Onda intua Sia in dinia in Ibilis minayá kon tudu in buḷud inta totok in moḷantud, kon tua sinundúnea kon i Yesus in bayongan dodatuan kon dunia takin kogaganea,

⁹ bo Ibilis in noguman kon i-Nia: “Tanaa komintan daitonku ogoi kon ini-Mu, aka Iko tumungkud mosumba kon inakó.”

¹⁰ Dá ki Yesus in notubag, “Bayádon iko, Ibilis! Sin aindon pinais nanaa: Iko in musti mosumba kon i Tuhan, ki Allahmu, bo tongábí Sia in motaau poibadaanmu!”

¹¹ Ibilis nonaḷámai kon i-Nia, bo malaekat mita in namangoi nosumba kon i Yesus.

Ki Yesus kon Galilea

¹² Kon wakutu in ki Yesus nokodongog kon ki Yohanes ain dinomok, Sia sinimí minayá in Galilea.

¹³ Sia nonaḷámai kon Nazaret bo minayá nogutun kon Kapernaum, kon bingkí in Danow Galilea, kon butá in Zebulon bo Naptali,

¹⁴ sinbá motompodon Pirman inta pinoyaput i Nabi Yesaya:

¹⁵ Nanaa: “Butá in Zebulon bo Naptali, daḷan mayá in danow, ḻipú kon ḻimako Ongkag in Yordan, Galilea, tampat in bangusa mita ibanea deeman Yahudi!

¹⁶ Bangusa inta nobiag kon bonu in sindip, mosia aindon nokoontong kon bayag inta moḷoben! Bo mosia inta nogutun kon ḻipú inta kinokoḷubungan in maut nomukádon in bayag!”

¹⁷ Mulai kon wakutu intua ki Yesus in noguman, “Pogogaidon in mogaid kon dosamu mita, sin ki Allah in mamangoidon momarenta saḷaku Datu!”

Ki Yesus nogoiní kon dumodudui-Nea mita

¹⁸ Kon tungkuḷ in ki Yesus minayá nongin bingkí in Danow Galilea, Sia in nokoontong kon intau taya dua mogutat, ki Simon (inta dinonoi ki Petrus) bo ki Andreas ki utatnea. Tua in tangoi monia. Mosia in koyogot mobukayad kon landará kon danow sin tuabí in oaidan monia, modomok kon toyá.

¹⁹ Ki Yesus noguman kon i monia: “Koḻigai, duduidon kon i-Nakó, sinbá moiko in baḻíon-Kudon mololandará kon intau.”

²⁰ Dá mosia in nonaḷámaidon kon landará monia bo dinumudui kon i Yesus.

²¹ Bo naonda i minayá nongkon tua, ki Yesus bui nokoontong kon intau taya dua doman mogutat, ki Yakobus ki adí i Zebedeus bo ki Yohanes ki utatnea, mosia koyota-yotakin i amá monia ki Zebedeus. Mosia yogot monoinutmai kon landará kon bonu uangga. Mosia inoiní i Yesus,

²² dá mosia in nonaḷámaidon kon uangga bo kon i amá monia, bo dinumuduidon kon i Yesus.

Ki Yesus notundú bo nongundam kon mobarong intau

²³ Ki Yesus minaya-mayá mako in bayongan ḻipú kon Galilea. Sia in sinumuot bo notundú kon bonu in baḷoi pososambayangan poḷat nopotaau in Habar Mopia soaḷ naonda in ki Allah mamangoi momarenta saḷaku Datu. Kon tua Sia nongundam doman kon bayongan panyaki in intau mita inta kon tua.

²⁴ Onu in inaidan i Yesus tua noisiardon kon bayongan ḻipú kon Siria, dá diniadon monia pinobayá kon i-Nia in bayongan intau inta nongotakit noonggotdon. Noyagi-yagimai in takit, oyúon in kinotoḷangan in dimukud moraat, oyúon takit in manuk, oyúon in diá mokobayá, mosia nopia mita i Yesus.

²⁵ Dá intau mobarong totok in dinumudui kon i-Nia. Oyúon nongkon Galilea, Dekapolis, Yerusalem, Yudea, bo oyúon doman nongkon ḻipú inta kon ḷoḷan Ongkag in Yordan.