MATIUS 27 - Alkitab Singog In Mongondow Masa In Tanaa

Ki Yesus dinia pinosarakan kon i Pilatus

¹ Naonda in modiugdon mobayag, bayongan imang itoi bo guhanga in ḻipú intau in Yahudi noyosipun bo nonantúdon kon moḻimod kon i Yesus.

² Sinogot monia in Sia, bo dinia pinosarakan kon i Pilatus, gubernur kon butá tatua.

Kinopatoian i Yudas

³ Kon wakutu in ki Yudas inta noposarakan kon i Yesus nokoontong kon ki Yesus in sinantúdon hukumon dapot matoi, nomanasaḷ in sia. Bo binayánea pinobui in doit saḷaka toḷu nopuḷú tatua kon i imang mita itoi bo guhanga mita in ḻipú.

⁴ Bo noguman, “Binaradosadon in akuoi sin noposarakan in dugú in intau inta diá kotaḷá!” Táe mosia notubag, “Deemanbí urusan nami intua? Tua in urusanmubí tontaní!”

⁵ Bo pinogarabnea in doit tatua kon bonu in Baḷoi Tuhan, bo minayá ginumantong.

⁶ Imang mita itoi in nogamá kon doit tatua bo nosingog, “Doit tanaa in diábí motaau posumba kon i Allah, sin doit tanaa in boḻibí in nyawa.”

⁷ Naonda in mosia noyosingog, nobaḻímai doit tatua pinotaḷuidon monia kon butá inta sinangoian. Butá in mogogaid kon kuyon sin baḻíon monia poḷoḷobongan kon intau mokokiangoi.

⁸ Tuamai butá tatua dapot in singgai naa sinangoian intau “Butá boḻi in dugú”.

⁹ Naonda intua nobaḻí, dá notompodon Pirman inta pinoyaput i Nabi Yeremia, “Mosia in notarima kon doit saḷaka toḷu nopuḷú, boḻi inta ain sinantú kon sigad in intau Israel, inta pas poguboḻi kon i-Nia.

¹⁰ Bo doit tatua pinoguboḻi monia kon butá intau inta mogogaid kon kuyon butá ná inta pinongoyow i Tuhan kon inakó.”

Ki Yesus kon tayowon i Pilatus

¹¹ Wakutu in ki Yesus dinia kon tayowon i gubernur. Ki gubernur noḻibó kon i-Nia, “Degá Iko Datu intau Yahudi?” Ki Yesus notubag, “Ikodon tontaní in noguman kon tua.”

¹² Táe wakutu in imang mita itoi bo guhanga mita in ḻipú noponapud in tosingogon kon i-Nia, diábí sinokotubagan-Nea.

¹³ Dá ki Pilatus in noḻibó kon i-Nia, “Degá diá dinongogmu in bayongan inta pinonapud in intau mita kon ini-Mu?”

¹⁴ Tongá diá inabatan-Nea totontagámai, sahingga in noherang totok in ki Gubernur tatua.

Ki Yesus pinopoḷabúan in hukuman matoi

¹⁵ Ain noibiasa kon i gubernur kon aka singgai moḷoben mopoḷuai in sia in tobatú intau kon ponjara, táe pokipiḻí kon intau moantó.

¹⁶ Kon wakutu intua kon ponjara oyúon tobatú intau inta totok in moraat, tangoinea in ki Yesus Barabas.

¹⁷ Popisí in mosia noyosipundon kon tua, dá ki Pilatus in noḻibó kon i monia, “Ki ine in koibog monimu poḷuaionku, ki Yesus Barabas andeka ki Yesus inta sinangoi ki Kristus?”

¹⁸ Ki Pilatus in noḻibó natua sin kinotaauanneadon kon dinia mangoi monia in ki Yesus bo pinosarakan popisíbí in mosia mointoi kon i-Nia.

¹⁹ Wakutu in ki Pilatus ḻimitúpa mako kon baḷoi pongadilan, ki buḷoinea nongoyow kon inia, “Donaai iko dumugang kon pelekara in intau mopia tanion, sin lantaran Sia yo akuoi in sinumogoindop kon diá mopia in kogobíi.”

²⁰ Táe lantaran pinakisa saḷaḷu in imang mita itoi bo guhanga in ḻipú, dá intau mita kon tua nonantúdon kon mopoigum sinbá poḷuaiondon in ki Barabas bo ki Yesus in hukumon matoi.

²¹ Ki gubernur noḻibó bui kon i monia, “Ki ine in kon ibog monimu poḷuaionku bo ogoi kon i monimu?” Mosia nomaḷú, “Ki Barabas.”

²² Dá guman i Pilatus kon i monia, “Aka natua, yo onuonku in ki Yesus inta sinangoi ki Kristus?” Mosia in nomaḷú komintan, “Sia musti popopakú kon kayu pinoyotaḻempang!”

²³ Sia in bui noḻibó, “Táe oaid moraat naonda inta aindon inaidan-Nea?” Táe mosia in kopiadon momaḷú in moguman, “Popopakú in Sia kon kayu pinoyotaḻempang!”

²⁴ Naonda in kinotaauan i Pilatus kon diádon sia mokobayow kon i monia tua, nodapot in momangkoidon mokacau totok, dá sia in nogamá kon tubig bo nonomok kon tayowon in intau moantó bo noguman, “Diábí in taḷáku kon dugú in intau tanaa! Tua in urusanbí monimu tontaní!”

²⁵ Bayongan in intau inta kon tua in notubag, “Pomayádon mako bain kami bo ki adí nami in motarima kon hukuman kon kopatoian-Nea!”

²⁶ Bo ki Barabas in pinoḷuaineadon bo inogoi kon i monia, táe ki Yesus in sinambokneapa muna; bodongka pinosarakannea sin pokipopakúdon kon kayu pinoyotaḻempang.

Ki Yesus pinoyambá monia

²⁷ Onda intua tontara mita i gubernur nodia kon i Yesus pinobayá in baḷoi pongadilan, bo bayongan in tontara noyosipun kon ḻibumai i Yesus.

²⁸ Iḷongkut monia in ḷambung-Nea bo pinakéan monia in jubah nokasumba.

²⁹ Mosia in noraot doman kon kawa dodugian, bo pinopobandow kon uḷu-Nea. Mosia in nopokadai doman in aog kon ḻima-Nea koḷanan, onda intua sinumungkud in mosia kon tayowon-Neamai bo mopoyagi-yagimai kon i-Nia, kai monia, “Salam, ei Datu intau Yahudi!”

³⁰ Mosia in nonduyá doman kon i-Nia, bo nogamá kon aog bo pinomobak kon uḷu-Nea.

³¹ Nopaḷut mako nopoyagi-yagimai kon i-Nia, iḷongkutdon bui monia in jubah inta pinopopaké monia kon i-Nia, bo bui iḷambungan monia in ḷambung-Nea tontaní. Noiduduimai kon tua diniadon monia pinoḷuai in Sia bo pinopopakú kon kayu pinoyotaḻempang.

Ki Yesus pinopopakú kon kayu pinoyotaḻempang

³² Naonda in mosia kon ḷuai in kotá, mosia noyodungkuḷ in tobatú intau inta nongkon Kirene ki Simon in tangoinea. Pinakisa monia in intau tatua pinoki potaanan in kayu pinoyotaḻempang inta popopakúan kon i Yesus.

³³ Bo nodapotdon in mosia in tampat inta sinangoian Joljuta, mangaḻenea, “Tampat in Ḷungkaká.”

³⁴ Kon tua Sia pinoinum monia in anggur inta binaukan in ompodu. Naonda in kinonanaman-Nea, doídon in Sia nonginum.

³⁵ Nopaḷut mako pinopopakú monia kon kayu pinoyotaḻempang, ḷambung-Nea in sinila-silai mako monia. Mosia nosilai kon ḷambung-Nea tatua takin nomaké in lot.

³⁶ Onda intua mosia iḻimitú kon tua noḷukad kon i-Nia.

³⁷ Bo kon ḻimonik in uḷu-Nea pinopopakuan monia in dopí inta pinaisan in pais inta binaḻí dodoyonan pinohukuman kon i-Nia: “Naadon in ki Yesus Datu intau Yahudi.”

³⁸ Kon tua oyúon doman in doyowa intau mononakow inta pinopopakú doman kon kayu pinoyotaḻempang noyotakin-Nea, tobatú kon dotá in koḷanan, bo tobatú kon dotá in koḷoigi-Nea.

³⁹ Intau mita inta noitaḻib kon tua moningkuḻe, bo momombiḻing kon i Yesus.

⁴⁰ Mosia in noguman, “Ei iko inta moibog mogumpag kon Baḷoi Tuhan, bo bui moposindog kon daḷom in toḷu nosinggai, aka Iko ki Adí i Allah, yo posaḷamatdon in awak-Mu tontaní bo poponagdon nongkon kayu pinoyotaḻempang tanion!”

⁴¹ Natua doman in imang mita itoi, mototundú mita kon agama bo guhanga mita in ḻipú moyotakin doman moningkuḻe kon i-Nia takin mosingog,

⁴² “Sia moposaḷamat kon intau ibanea, táe awak-Nea tontaní diá koposaḷamatan-Nea! Sia Datu in Israel, aka Sia moponag nongkon kayu pinoyotaḻempang tatua yo kami in mopirisayabí kon i-Nia.

⁴³ Sia moharap mako kon i Allah mamangoi. Pomayá mako sinbá ki Allah in mamangoi bo moposaḷamat kon i-Nia, aka koibog i Allah in Sia! Sin Sia aindon nongaku kon Sia kaín in ki Adí i Allah.”

⁴⁴ Intau mononakow inta pinopopakú doman kon kayu pinoyotaḻempang noyotakin-Nea noningkuḻe doman natua kon i-Nia.

Ki Yesus minatoi

⁴⁵ Pinangkoi kon jam mopuḷú bodoyowá moutu in singgai nodapot in jam nogintoḷu sinimindip in ḻipú tatua.

⁴⁶ Degá jam nogintoḷudon ki Yesus in nomaḷú noropot, kai-Nia, “Eli, Eli, lama Sabaktani?” mangaḻenea, “Allah-Ku, Allah-Ku nongonu sin sinaḷáan-Mubí in Akuoi?”

⁴⁷ Nokodongogmai kon tua intau mita inta sinimindog mako, noguman, “Sia in nokuuk kon i Elia!”

⁴⁸ Bo namangoi in tobatú nongkon i monia tua, bo nogamá kon bungang karang bo pinoḷodok kon anggur boil bo pinopoturak kon aog bo pinopodiug kon bibig i Yesus.

⁴⁹ Táe intau mita ibanea in noguman, “Donaai, maníka bo indoian naton mongo ki Elia in mamangoi moposaḷamat kon i-Nia!”

⁵⁰ Ki Yesus in nomaḷú bui noḷangon bodongka noposarakan in nyawa-Nea.

⁵¹ Bo indoiainmai, gorden in Baḷoi Allah nobisik nosilai doyowa nongkon ḻimonikannea nodapot in ḻimonagannea. Bo dinandúan bo buḷud mita in batu nongobotak.

⁵² Bo poḷoḷobonganan mita nongobukat bo nobayong in intau mita inta mopia bo mopirisaya kon i Allah inta aindon minatoi in nobiag bui.

⁵³ Bo naonda in ki Yesus nobiagdon bui, mosia iḷumuai nongkon poḷoḷobongan, bo sinumuot kon kotá in Yerusalem. Bo noantó intau nokoontong kon i monia.

⁵⁴ Itoi in tontara takin prajurit-Nea inta noḷukad kon i Yesus noondokdon totok naonda in nokoontong kon ḻinug bo onu inta aindon nobaḻí tatua, bo mosia nosingog, “Totuubí, kon Sia naa in ki Adíbí i Allah!”

⁵⁵ Bo kon tua nobayong doman in bobay inta noindoi nongkon noyayú, mosia tua in bobay mita inta dinumudui kon i Yesus nongkon Galilea sin mobantung kon i-Nia.

⁵⁶ Kon sigad monia tua, oyúon doman in ki Maria Magdalena, bo ki Maria inta ki iná i Yakobus bo i Yusup, bo ki buḷoi i Zebedeus.

Ki Yesus iḷobong

⁵⁷ Naonda in noungkoḷomdon, oyúon in intau inta nooyúon nongkon Arimatea, tangoinea in ki Yusup, sia in nobaḻídon murí i Yesus.

⁵⁸ Sia minayá kon tayowon i Pilatus bo noigum kon mayat i Yesus. Bo ki Pilatus nomarentadon kon i monia kon ogoi in mayat tatua kon inia.

⁵⁹ Bo dinia i Yusup in mayat tatua, binakutnea in pusi noaḷus bo nodarit totok.

⁶⁰ Bodongka pinopouḻidnea kon poḷoḷobongan nobagu, inta kinaḻinea kon bonu in buḷud batu. Nopaḷut mako iḻingkopannea in batu moḷoben, bodongka minayá.

⁶¹ Táe ki Maria Magdalena bo ki Maria ibanea kon tuapa ḻimitú mako kon tayowon poḷoḷobongan tatua.

Poḷoḷobongan i Yesus iḷukadan

⁶² Nopoikoḷomai kon singgai, singgai in Sabat, imang mita itoi bo intau mita in Parisi noyotakin minayá kon i Pilatus,

⁶³ bo noguman, “Tuang, kinotoropan nami, Intau mouboḷ tatua kon wakutu in nobiagpa, perna noguman, ‘Naonda in toḷu nosinggai mobiag in Akuoi bui.’

⁶⁴ Manangka intua pokiḷukadon kon moḷoḷukad mita in poḷoḷobongan tatua modapot in singgai intoḷunea; sin dika bo angoion in murí-Nea mita takowon in mayat-Nea, bo poguman monia kon Sia aindon nobiag bui kon sigad in intau mita minatoi. Sahingga in uboḷ kon singgai tumi in moraa-raatdon nongkon inta muna.”

⁶⁵ Dá ki Pilatus in noguman kon i monia, “Naa in moḷoḷukad mita, bayá bo ḷukadaidon kopira in poḷoḷobongan tatua.”

⁶⁶ Mosia in minayá in poḷoḷobongan tatua bo sinilotan monia bodongka iḷukadan.