MATIUS 26 - Alkitab Singog In Mongondow Masa In Tanaa

Tomayá moḻimod kon i Yesus

¹ Naonda in ki Yesus nopaḷut nobogoi in topotundú natua, Sia in noguman kon murí-Nea mita,

² “Kinotaauan monimu kon doyowapa nosinggai porayaan kon singgai moḷoben Paska, dá kon wakutudon tua Adí Intau posarakan sin popopakú kon kayu pinoyotaḻempang!”

³ Kon dodai intua imang mita itoi bo guhanga mita in ḻipú intau Yahudi noyosipun kon palas i Kayapas, imang moḷoben.

⁴ Mosia in noyosingog kon naonda in pododomok kon i Yesus bo poḷat moḻimod kon i-Nia.

⁵ “Táe,” kai monia, “donaaibí kon wakutu in porayaan, sinbá diá mokopomuká kon ropatoi kon sigad in intau mita kon tua.”

Ki Yesus ininggúan in ḷana nobondu

⁶ Naonda in ki Yesus kon Betania, kon baḷoi i Simon inta koḻipod pinanyaki kusta,

⁷ kon tua namangoidon kon i Yesus in tobatú bobay inta kodia-dia in botoḷ in ḷana nobondu inta nomahaḷ totok in boḻinea. Ḷana tatua pinopoinggúnea kon uḷu i Yesus, wakutu intua ki Yesus koyogot nongaan.

⁸ Nokoontongmai kon tua murí-Nea mita sinumorú poḷat noguman, “Nongonu sin tongábí poguyaatonmu in ḷana tanion?

⁹ Ḷana tanion motaaubí potaḷuimu bo doit boḻinea in motaaumu ogoi kon intau inta nongobogá!”

¹⁰ Táe kinotaauan i Yesus in raian monia, dá Sia in noguman, “Nongonu sin moiko in moposusabímai kon bobay tanaa? Sia tua in aindon nogaid kon inta mopia kon i-Nakó.

¹¹ Intau nongobogá mita in umuran moyotakin monimu, táe Akuoi naa in diábí tantú moyotaki-takin mako monimu.

¹² Kon dodai in sia nopoingú in ḷana tatua kon awak-Ku, sia aindon noposadia kon poḷobongan kon i-Nakó.

¹³ Poguman-Ku kon i monimu! Kon ondakabí in popotaauan in Habar Mopia tanaa, yo onu inta inaidan in bobay tanaa kotangoianbí doman sinbá kotoropan in sia.”

Ki Yudas noyopakat nomaḻidawan kon i Yesus

¹⁴ Noiduduimai kon tua, murí i Yesus tobatú inta kon sigad in murí-Nea mita mopuḷú bodoyowá, inta ki Yudas Iskariot, minayá kon imang mita itoi.

¹⁵ Bo noḻibó, “Onu in ogoi monimu kon i nakó, aka Sia posarakanku kon i monimu?” Dá inogoian monia in doit saḷaka toḷu nopuḷú in sia.

¹⁶ Bo kon dodaipa doman intua sia umuran motayak kon kasampatan mopia sin moposarakan kon i Yesus.

Ki Yesus nongaan noyotakin in murí-Nea mita kon singgai in Paska

¹⁷ Kon singgai dungkuḷ pinoramean kon Singgai Moḷoben Roti diá koragi, murí-Nea mita namangoidon kon i-Nia bo noḻibó, “Kon onda degá in kon ibog i Pak Guru posadiaan nami kon pongaanan naton moyotakin kon singgai in Paska naa?”

¹⁸ Ki Yesus in noguman, “Bayádon kon tobatú intau inta kon kotá bo pogumandon kon inia nanaa in koyow i Guru, ‘Wakutu-Ku nodiugdon dá tuamai Akuoi in moibogdon morame kon singgai in Paska takin murí-Ku mita.’ ”

¹⁹ Bo onu inta pinoguman i Yesus kon i monia dinuduian monia, mosia in nosadia kon pongaanan kon singgai in Paska tatua.

²⁰ Naonda in singgai nodoḷomdon, ki Yesus in iḻimitú nongaan noyotakin in murí-Nea mita inta mopuḷú bodoyowá tua.

²¹ Bo naonda in mosia koyogot nongaan, Sia in noguman nanaa, “Akuoi in mogumandon muna kon i monimu: kon sigad monimu naa oyúon in tobatú murí in moposarakan kon i-Nakó.”

²² Nokodongogmai kon tua norobonoḷ totok gina in murí-Nea, dá kon batúannea noguman kon i-Nia, “Deemanbí akuoi Tuhan?”

²³ Ki Yesus noguman, “Sia inta noyododai-Ku nopoḷodok in roti kon bonu in palo tanaa, sia tua inta moposarakan kon i-Nakó.

²⁴ Adí Intau in memang mustibí mayá podudui inta aindon pinais soaḷ Sia, táe moboditodon in intau inta moposarakan kon i Adí Intau tatua. Mopia-piabí in intau natua diá pinononggadí!”

²⁵ Ki Yudas inta moposarakan kon i-Nia tua in noguman doman, “Deemanbí akuoi naa Guru?” Ki Yesus in noguman kon inia, “Natua kain singogmu.”

Pinongaanan i Tuhan

²⁶ Bo kon dodai in mosia koyogot nongaan ki Yesus in nogamá kon roti bo nomarakat poḷat binonsi-bonsig bo inogoi kon murí-Nea mita, bo noguman: “Gamádon bo kaandon, naa in awak-Ku.”

²⁷ Nopaḷut intua Sia nogamá kon pongonginuman, bo nosukur bodongka nobogoi kon i monia takin noguman, “Ponginumdon moiko komintan nongkon pongonginuman tanaa.

²⁸ Sin naadon in dugú-Ku, dugú dodandian, inta noibutak sin pinongampung kon taḷá in intau moantó.

²⁹ Táe poguman-Ku kon i monimu: Mulai tanaa mako Akuoi in diá bidon monginum bui kon bungai in anggur tanaa modapot kon singgai Akuoi monginum kon anggur mobagu moyotakin monimu kon bonu in dunia mobagu i Amá-Ku.”

³⁰ Nopaḷut mako, mosia nopodondong in dondong dodayow. Bo nopaḷut mako kon tua mosia in notakodon kon Buḷud in Zaitun.

Pinotaaudon muna i Yesus kon ki Petrus in doí mongaku murí-Nea

³¹ Kon tua ki Yesus in noguman kon i monia, “Doḷom naa moḻiai in pirisaya monimu komintan kon i-Nakó; sin aindon pinais: Ki Allah noguman, ‘Akuoi in moḻimod kon gombala, bo domba mita tatua in moḷagui posibayá.’

³² Tongá naonda in Akuoi mobiag bui, Akuoi in umuna kon i monimu mayá in Galilea.”

³³ Ki Petrus in notubag kon i-Nia, “Umpakabí pirisaya monia kon ini-Mu mobaḷui, táe pirisayaku kon i Tuhan in diábí mobaḷu-baḷui!”

³⁴ Ki Yesus in noguman kon inia, “Poguman-Kudon kon inimu, doḷom naa kon wakutu in manuk diápa mokukú, yo iko in koyongandon kotoḷu momayow kon deemanbí murí-Ku.”

³⁵ Ki Petrus in bui noguman kon i-Nia, “Pakabí Akuoi matoi moyotakin-Mu, yo akuoi in diábí moguman kon deeman murí-Mu!” Murí-Nea doman mita ibanea in noguman doman natua.

Ki Yesus kon Taman Getsemani

³⁶ Onda intua ki Yesus bo murí-Nea mita minayá in tampat inta tangoinea Getsemani. Bo sia in noguman kon murí-Nea mita, “Ḻitúdon kon naa, sin Akuoi in mayápa mosambayang kon tua.”

³⁷ Bo dinia-Nea in ki Petrus bo ki adí i Zebedeus doyowa noyotakin-Nea. Bo mulaidon morobonoḷ in dodob-Nea bo moondok.

³⁸ Dá Sia in noguman kon i monia, “Morobonoḷdon totok in dodob-Ku, korasaan nádon onda bo matoi. Kon naapa in moiko bo moḷukad moyotakin-Ku.”

³⁹ Bo inumuna topiḻik in Sia bodongka sinumungkud nosambayang, kai-Nia, “O Amá-Ku, aka motaau, yo Inggamáaidon in roriga tanion nongkon i Nakó, tongá dikabí dumudui kon ibog-Ku táe aidaidon ná inta kinoibog i Amá.”

⁴⁰ Nopaḷut mako nosambayang minayá bui in Sia kon murí-Nea mita, táe kinobayáan-Neamai mosia nosiug mako. Dá Sia in noguman kon i Petrus, “Eta diádon mokotahang in moiko in moḷukad takin-Ku umpaka tongá tojam?

⁴¹ Umuran poḷukad bo posambayang sinbá moiko in diá mokorasa kon sobaan, sin kinotaauan-Ku bidon in moiko, moiko in moibogbí mogaid kon inta kinoibog i Allah, táe moiko in tongábí intau moyangkó.”

⁴² Bo kon induaneadon in Sia minayá nosambayang, kai-Nia, “Amá-Ku, aka roriga tanaa musti kobayáan-Ku, sin diá motaau poyayúon kon i-Nakó, yo aidaidon ná inta koibog-Mu.”

⁴³ Bo naonda in Sia nobui mangoi, kinobayáan-Neamai mosia nosiugdon doman mako, Sin totokdon tomposiug mosia.

⁴⁴ Pinomayá-Neadon mako in mosia in nosiug, bo Sia in bui minayá nosambayang kon intoḷunea, bo nosambayang ná inta sambayang-Nea muna.

⁴⁵ Onda intua namangoi in Sia kon murí-Nea bo noguman kon i monia, “Umuranpa doman degá in moiko mosiug bo mogogai? Indoiai, naadon in wakutunea ki Adí Intau posarakan kon kawasa in intau mita baradosa.

⁴⁶ Pobangondon, bo igai mayádon in kita. Sin inta moposarakan kon i-Nakó in nodiugdon!”

Ki Yesus dinomok

⁴⁷ Wakutu in ki Yesus yogotpa noyosingog, ki Yudas, tobatú murí-Nea in namangoidon noyotakin in intau mobayong inta kodia-dia in pitow. Bo bobobak, tua komintan in pinoki dia in imang mita itoi bo guhanga in ḻipú intau Yahudi.

⁴⁸ Intau inta moposarakan kon i Yesus munadon nopotaau kon onu in pomiaannea kon i Yesus, “Intau inta inayokanku. Sia intua, dá domokdon!”

⁴⁹ Noiyaputmai intua Sia inumuna nokipodungkuḷ kon i Yesus bo noguman, “Salam, Pak Guru!” Bodongka nongayok kon i-Nia.

⁵⁰ Táe ki Yesus in noḻibó kon inia, “Utat, onu in mangaḻe inangoianmu in naa?” Bo intau mita inta noyotakin i Yudas minayá nokadai kon ḻima i Yesus bo nodomok kon i-Nia.

⁵¹ Táe tobatú dumodudui i Yesus inta kon tua in norabut kon pitow bo nonimboi kon tobatú simpaḷ i imang moḷoben, sahingga in nopongkó in bongoḷannea.

⁵² Ki Yesus in noguman kon inia, “Tungkogdon bui in pitowmu kon gumánea, sin ki ine in momaké in pitow, yo sia in matoi doman in pitow.

⁵³ Andeka iraimumai yo degá Akuoi in diábí motaau mokituḷung kon i Amá-Ku, bá ḷagi-Nea potabá mangoi in noiḻiu kon mopuḷú bodoyowá in tontara malaekat motuḷung kon i-Nakó?

⁵⁴ Aka natua, yo naonda degá in mogintompod kon inta pinais kon bonu in Buk Motusi, inta ain noguman, kon tua in mustibí mobaḻí?”

⁵⁵ Wakutu intua ki Yesus nosingog kon intau moantó inta namangoi nodomok kon i-Nia, “Irai monimu degá Akuoi naa mononakowbí sahingga in moiko mamangoi kodia-dia in pitow bo bobobak bo modomok kon i-Nakó? Pomuḷoi in singgai Akuoi in ḻimitú mako kon Baḷoi Tuhan, bo motundú kon tua táe diábí dinomok monimu!

⁵⁶ Táe totuu kon tua in mustibí mobaḻí sinbá motompodon onu inta aindon pinais kon bonu in buk nabi mita.” Kon tua dumodudui-Nea noḷagui komintan nonaḷámai kon i-Nia.

Ki Yesus kon tayowon in Sidang Agama

⁵⁷ Naonda in dinomok monia in ki Yesus, dinia monia pinotayow kon i Kayapas. Tobatú imang moḷoben. Kon tua aindon nosipun in mototundú mita kon agama bo guhanga mita in ḻipú.

⁵⁸ Ki Petrus in dinumudui kon i-Nia nodapot in palas i imang moḷoben tongá iyumayú. Naonda in kon palas tatua sia iḻimitú kon sigad in intau inta moḷoḷukad mita sin moindoi kon onu inta mobaḻí modapot in mopaḷut.

⁵⁹ Imang mita itoi bo bayongan in Sidang Agama moḷongasi motayak kon taḷá-Nea, sinbá baḻíon dodoyonan pohukuman kon i-Nia modapot in matoi.

⁶⁰ Táe diá kinouḻían monia kon taḷá umpakabí nobayong in intau in simindog mobogoi in katarangan uboḷ. Bo pangabisannea namangoi in muna in intau taya dua.

⁶¹ Mosia in noguman, “Intau tanaa in nosingog, ‘Akuoi in mokoumpag kon Baḷoi i Allah bo kon bonu in toḷu nosinggai koposindogan-Kudon bui.’ ”

⁶² Imang moḷoben in sinimindog bo noḻibó kon i-Nia, “Degá diá tubagan-Mu in singog mita inta pinonapud in intau mita tanaa kon ini-Mu?”

⁶³ Táe ki Yesus tongábí kibio-biómai. Bo imang moḷoben tatua in noguman kon i-Nia: “Popodoyon kon i Allah inta nobiag, yo pogumankadon kon inami, mongo Iko degá in ki Mesias ki Adí i Allah, andeka, deeman?”

⁶⁴ Ki Yesus nogabat, “Natuata in gumanmu. Táe pirisayadon: pinangkoidon kon tanaa mako, moiko in mokoontong kon i Adí Intau in ḻimitú kon dotá in koḷanan i Inta Totok in Mokawasa bo mamangoi mongin ḻimonik in goḷom mita kon ḷangit!”

⁶⁵ Nokodongogmai kon tua, ki imang moḷoben nomerak kon ḷambungnea, bo nosingog, “Sia in noningkuḻe kon i Allah! Diá bidon paraḷu in kita motayak kon sakusi ibanea. Moiko tontaní in nokodongogdon kon tosingogon inta pinoningkuḻe-Nea kon i Allah.

⁶⁶ Aka podudui in raian monimu yo naonda?” Tubag monia, “Kotaḷá in Sia, musti hukumon modapot in matoi.”

⁶⁷ Bo dinuyáan poḷat kinoyungkuman monia in pogot-Nea; intau mita ibanea nomongkug doman kon i-Nia,

⁶⁸ bo noguman: “Tungkuḷaika poguman kon inami, ei Mesias, ki ine degá in nomongkug kon ini-Mu?”

Bayow i Petrus

⁶⁹ Ki Petrus in ḻimitú mako kon ḷuai in palas, bo namangoi in tobatú simpaḷ bobay bo noguman kon inia, “Iko doman inta saḷaḷu moyotakin i Yesus, Intau in Galilea tatua?”

⁷⁰ Táe sia in nomayow kon tayowon intau moantó tatua kainia, “Diábí kinotaauanku onu in mangaḻe in tosingogonmu.”

⁷¹ Naonda in sia minayá in ngara moḷoben, simpaḷ ibanea in nokoontong kon inia bo noguman kon intau mita inta kon tua, “Intau tanaa in takinbí i Yesus Intau in Nazaret tatua.”

⁷² Bo sia in nomayowdon takin nongibot, “Totu-totuubí kon diábí kinotaauanku in Intau tatua.”

⁷³ Diá noonggot nongkon tua namangoidon in intau mita kon tua kon i Petrus bo noguman, “Tantú iko in dumodudui-Neabí doman sin kotaauan totok kon pososingogmu.”

⁷⁴ Dá nomangkoidon in ki Petrus nongutuk bo nongibot, kainia, “Diábí kinotaauanku in Intau tatua!” Bo kon dodaipa doman tatua manuk nokukú.

⁷⁵ Bo kinotoropandon i Petrus onu inta ain pinoguman i Yesus kon inia, “Wakutu in manuk diápa mokukú iko in kotoḷudon nomayow kon deeman murí-Ku.” Bo iḷumuai in sia, bo nongombaḷ sin norobonoḷ totok in ginanea.