MATIUS 25 - Alkitab Singog In Mongondow Masa In Tanaa

Poumpamaan mongodeaga taya mopuḷú

¹ “Kon wakutu in koangoian i Allah saḷaku Datu, in naonda bo poumpamaan tanaa: Mopuḷú in mongodeaga nogamá kon togá, monia bo nonontomu kon nonikaan ḷoḷaki.

² Ḻima in kon sigad monia tua in nobodok, táe ḻima doman in mobijaksana.

³ Mongodeaga mita inta bodok tua nodia kon togá, tongá diá nodia kon ḷana.

⁴ Táe mongodeaga taya ḻima inta mobijaksana, mosia in nodia kon togá bo nodia doman kon ḷana kon botoḷ.

⁵ Bo popisí in nonikaan ḷoḷaki tatua noonggotdon in pinogoḷatan mako táe diápa doman noiangoi, sinomposiug in mosia komintan, dá nosiugdon in mosia.

⁶ Naonda in noonggotdon kon doḷom dinongogmai oyúon in singog noguman nanaa, ‘Nonikaan niondon! Tontomudon in sia!’

⁷ Dá mongodeaga mita tatua norobangon bo noponugung in ḷana kon togá monia.

⁸ Mongodeaga mita inta bodok noguman kon mongodeaga mita inta mobijaksana, ‘Ogoiaipa in ḷana monimu biar tongá topiḻik, sin togá nami aindon mopiong.’

⁹ Táe mongodeaga mita inta mobijaksana mita tatua in notubag, ‘Diá motaau! sin dika bo diá doman tugat kon inami bo kon i monimu. Maníka bo bayádon in moiko potaḷui kon i monia inta mopopotaḷui in ḷana.’

¹⁰ Táe wakutu in mosia minayá notaḷui kon ḷana. Noiangoidon in nonikaan tatua, bo mosia inta ain nobasadia in sinumuot noyotakinnea kon ruangan ponikaan tatua, bo iḻingkopandon in ḷoḻingkop!

¹¹ Onda intua noiangoidon in mongodeaga mita inta bodok bo noguman, ‘Tuang, Tuang, bukataipa in ḷoḻingkop sin tuotan nami.’

¹² Tongá sia in notubag, ‘Diábí kotaauan-Ku mongó ki ine in moiko!’ ”

¹³ Bo pangabisannea ki Yesus in noguman, “Manangka intua umuran kiḷuka-ḷukadmai, sin diábí kotaauan monimu in singgai bo wakutunea.”

Poumpamaan simpaḷ taya toḷu

¹⁴ “Aka ki Allah mamangoi saḷaku Datu, yo kaadaannea in naonda bo intau inta moibog mayá in ḻipú ibanea. Sia in nogoiní kon simpaḷnea mita bo nosilai kon kapunyaannea sin pinoki ḷukad.

¹⁵ Inta tobatú inogoiannea in ḻima noribu in doit buḷawan, tobatú inogoiannea in doyowa noribu, bo inta tobatú inogoiannea in toribu. Sia in nobogoi natua kon i monia pinodudui in komampuan monia tontaní. Nopaḷut mako nobogoi kon tua, sia minayá.

¹⁶ Simpaḷ inta notarima kon ḻima noribu tua minayá, bo nopobaraguna in doit inta inogoi tatua dá nokouḻí in sia kon ḻima doman noribu bui.

¹⁷ Ná doman tua in simpaḷ inta nokouḻí kon doyowa noribu, pinobaragunanea doman intua, sahingga in nokouḻí doman kon kauntungan doyowa noribu.

¹⁸ Tongá simpaḷ inta notarima kon toribu, minayá in sia bo nongaḻi kon butá bodongka iḷobongnea in doit i tuangnea tatua.

¹⁹ Noonggotmai kon tua nobuidon mangoi in ki tuang monia tatua bo nogiap kon onda inta nouḻí monia.

²⁰ Simpaḷ inta notarima kon ḻima noribu, namangoi bo nodia kon kauntungan ḻima noribu doman, bo sia in noguman, ‘Tuang doit ḻima noribu inta pinoki kadai i tuang kon i nakó, indoiaika, aindon pinopobaragunaku dá nokouḻí kon kauntungan ḻima noribu doman.’

²¹ Bo ki tuangnea tatua in noguman kon i nia, ‘Tua in nopia, iko in simpaḷku inta mopia bo mojujur; iko aindon nogaid kon oaidan inta mointok inta pinoki aid kon inimu, manangka intua iko in ogoiankudon in tanggung jawab mogaid kon oaidan moḷoben. Angoidon bo duduidon mobarasanang takinku!’

²² Bo namangoi domandon in simpaḷ inta notarima kon doit doyowa noribu bo noguman, ‘Tuang, doit doyowa noribu inta pinoki kadai i tuang kon inakó, Indoiaika, aindon pinobaragunaku dá nokouḻídon kon kauntungan doyowa doman noribu.’

²³ Dá ki tuangnea tua in noguman kon inia, ‘Tua in nopia, iko simpaḷku inta mopia bo motuḻid in gina. Popisí in iko aindon nogaid kon oaidan inta mointok takin gina motuḻid, dá iko ogoiankudon in tanggung jawab mogaid kon oaidan moḷoben. Tuot bo pobarasanangdon takinku!’

²⁴ Kon tua namangoidon doman in simpaḷ inta inogoian in doit buḷawan toribu, sia noguman, ‘Tuang, kinotaauanku iko in intau inta morogi totok bo inta nokoyut kon gobá inta deeman binunakanmu bo nopuyut kon bungai in inta deeman pinomuḷamu.

²⁵ Tuamai akuoi in moondok dá doit buḷawan toribu inta inogoi i tuang kon inakó binayáku iḷobong kon butá! Bo naa, pobuionkudon bui in kapunyaan i Tuang.’

²⁶ Dá ki tuang tatua noguman kon inia, ‘Ei iko, simpaḷ inta moraat bo maḷat! Kinotaaunmu bidon kon akuoi in mokokoyut kon gobá inta deeman binunakanku bo nopuyut kon bungai in inta deeman pinomuḷa-Ku?

²⁷ Tuamai, maní inogoiku in doitku tanion kon intau inta moibog mopobaraguna, sinbá aka akuoi mobui mangoi yo motarima kon kauntungannea.

²⁸ Tuamai in gamádon in doit buḷawan inta kon inia bo ogoidon kon intau inta aindon mopuḷú in doit buḷawannea.

²⁹ Sin pomuḷoi intau inta nooyúondon yo duganganbí bui, sinbá kalebeannea in mobarong totok. Táe ki ine inta diá nooyúon, yo onupa doman inta oyúon kon inia tua yo gamáandon doman nongkon inia.

³⁰ Bo simpaḷ tanion inta diá in baragunanea pogarabdon mako kon bonu in tampat inta sindip totok. Kon tua sia in mongombaḷ bo mororiga!’ ”

Ponantúan kon Singgai Tumi

³¹ “Aka ki Adí Intau mamangoi saḷaku Datu bo sinakinan in malaekat mita, yo Sia in ḻimitú kon tampat pomarentaan-Nea.

³² Bo bayongan intau in sipunon kon tayowon-Nea bo poyotontaníon-Nea i mosia naonda gombala mopoyotontaní in domba bo bembé.

³³ Domba mita in tampaton-Nea kon dotá in koḷanan-Nea, yo bembé mita in kon dotá in koḷoigi-Nea.

³⁴ Bo Datu tatua in moguman kon i monia inta kon dotá in koḷanan-Nea, ‘Igai, in moiko inta binarakatan i Amá-Ku, tuotdon kon dodatuan inta aindon sinadia kon i monimu kon wakutupa in dunia naa bagupa binaḻí.

³⁵ Sin wakutu in akuoi ginogoy, inogoian monimu Akuoi in kaanon, wakutu in Akuoi noyogang, inogoian monimu in Akuoi in inumon; wakutu in Akuoi nobaḻí intau mokokiangoi sinarima monimu in Akuoi kon baḷoimu.

³⁶ Wakutu in Akuoi diá koḷambung; inogoian monimu in Akuoi in pakeang; wakutu in Akuoi notakit, sinompia monimu; wakutu in Akuoi kon bonu in ponjara, inangoi inindoian monimu.’

³⁷ Dá intau mita mongopia tatua in noḻibó kon i-Nia, ‘Tuhan, kon dodaibí in onda inontong nami ki Tuhan in ginogoy bo inogoian nami in kaanon, andeka noyogang bo inogoian nami in inumon?

³⁸ Bo dodaibí in onda in inontong nami in ki Tuhan saḷaku intau mokokiangoi, bo sinarima nami in ki Tuhan kon baḷoi nami andeka diá nogiḷambung bo inogoian nami in pakeang?

³⁹ Kon dodai doman in onda inontong nami in ki Tuhan notakit andeka kon bonu in ponjara bo binayá nami inindoian?’

⁴⁰ Datu tatua in motubag kon i monia, ‘Bá poguman-Kudon kon i monimu: onu inta aindon inaidan monimu kon i utat-Ku mita inta totok in bogá tanaa, yo tua in notongkaibí in pinogaid monimu kon i-Nakó!’

⁴¹ Bo Sia in noguman doman kon i monia inta kon dotá in koḷoigi-Nea, ‘Bayádon in moiko nongkon tayowonku, sin moiko in intau mita inta binaḷa! Bayádon bo tuotdon kon bonu in tuḷu inta diá mopio-piong sin tua in sinadia in Ibilis bo malaekatnea kon i monimu!

⁴² Sin wakutu in Akuoi ginogoy, diá inogoian monimu in kaanon in Akuoi, wakutu in Akuoi noyogang, diá inogoian monimu in inumon.

⁴³ Wakutu in Akuoi nobaḻí intau mokokiangoi, diá inogoi monimu in Akuoi sinumuot kon baḷoi. Wakutu in Akuoi diá koḷambu-ḷambung, diá inogoian monimu in pakeang wakutu in Akuoi notakit bo kon bonu in ponjara, diá binayá inindoian monimu.’

⁴⁴ Bo mosia in noḻibó kon i-Nia, ‘Tuhan, kon dodaibí in onda inontong nami in ki Tuhan ginogoy andeka noyogang, andeka namangoi saḷaku intau mokokiangoi, andeka diá nogiḷambung andeka notakit, andeka kon bonu in ponjara bo diá inangoi sinompia nami in ki Tuhan?’

⁴⁵ Bo Sia notubag kon i monia, ‘Bá poguman-Ku kon i monimu: aka tua komintan bo diá pinopoaid monimu kon intau inta totok in bogá tanaa, yo tua in notongkai doman in diá pinopoaid kon i-Nakó.’

⁴⁶ Bo mosia naa in bonuon kon tampat pohohukuman mononoi, táe intau inta mopia in mokouḻí kon kobiagan inta mononoi.”